25 Aña di castigo di prizon pa Burney “ Nini” Fonseca

WILLEMSTAD – Corte di Husticia ayera mainta a dicta sentencia den e caso Magnus/Maximus cu t’e nòmber cu a duna e caso di asesinato di Helmin Wiels dia 5 di mei 2013 na pier di Marie Pampoen.

Huez señora mr. M. T. Paulides a condená Burney “Nini” Fonseca na 25 aña di castigo, ya cu e t’esun cu a organisá e asesinato aki.

Burney Nini Fonseca n’e momentonan aki ya ta sintando un castigo di prizon na Hulanda, debí na otro condena relacioná cu traficacion di droga y labamentu di placa.

Como tal e no tabata presente personalmente, pero a sigui su caso, respectivamente a scucha su condena atrabes di un conferencia via video.

 

Huez senora Paulides a splica cu e acusacionnan ta legal y convincentemente probá y ta sostené riba 4 pilar importante, esta declaracionnan di 3 testigo, anto mensahenan di sms entre Nini Fonseca y George Jamaloodin.

Pues ta base di  declaracionnan di Elvis Kuwas, alias  “Mònster”, kende t’esun cu a efectuá e asesinato contra di pago di 100.000 florin cu intervencion Burney “Nini” Fonseca cu na su turno a ricibí e placa for di George Jamaloodin.

Pa ta exacto Huez a referí na contactonan telefónico y/òf mensahenan entre Burney “Nini”  Fonseca y George Jamaloodin, declaracionnan di E. Gumbs, e testigo S.J. Rombley.

 

Haciendo mencion explícitamente di e nòmber di George Jamaloodin a bira cla cu e ciudadano aki sin duda ta un di e autornan intelectual di e asesinato.

George Jamaloodin n’e momentonan aki ta den exterior, esta na Venezuela, caminda e ta someté n’e proceso pa keda entregá na autoridadnan di Willemstad pa tambe keda husgá di manera cu e tambe lo tin di sinta un castigo di prizon.

 

Huez ayera mainta durante e sesion cu a dura no mas cu 20 minuut a condená Burney “Nini” Fonseca na un castigo di prizon di 25 aña.

 

 

Top