30 di october ta recorda cu 41 aña pasa Aruba a haya su ortografia tradicional etimologico

Un pais cu ta respeta su mes y cu kier profila entre tur otro pais na mundo, fuera di su identidadnan manera himno, bandera y escudo, mester tin tambe su propio idioma cu t’e vehiculo principal pa comunicacion den pueblo.

Y den e caso aki nos ta referi na nos idioma Papiamento cu pa siglo y siglonan ta ser papia y skirbi dor di nos habitantenan.

 

Tabata riba iniciativa y vision di nos Libertador Betico Croes, kende den su lucha pa Status Aparte a sinti e necesidad pa bin cu un propio ortografia oficial pa Aruba.

Consecuentemente Gobierno di Teritorio Insular di Aruba a instala un Comision di Ortografia dia 5 di mei 1976, cu e meta di formula y recomenda un ortografia na Gobierno.

 

E comision aki tabata bao di presidencia di sr. Jossy Mansur. E otro miembronan tabata sra. Ofelia Paris, sres. Hubert Booi, Holmo Henriquez, Thomas Ruiz, Julio Maduro, August Croes y Salomon Fingal.

Como Secretario a fungi sr. Juan Thijsen. E comision den forma diligente a cuminsa haci su trabao y ya dia 13 di september 1976 nan a entrega nan recomendacionnan na Gobiero di Aruba.

Dia 30 di october 1976 Parlamento di Aruba a aproba e ortografia recomenda p’e comision aki.

 

E recomendacion tabata e ortografia etimologico cu ta cuadra completamente cu nos identidad, tradicion y nos cultura. Cu e logro historico aki Betico Croes a percura un biaha mas pa salvaguardia otro tradicion cultural di nos pueblo.

Pero esaki no a keda t’ey so ya cu tabata Gabinete Oduber II cu a percura dia 21 di mei 2003 pa Papiamento bira e idioma oficial di Aruba banda di e idioma Hulandes y asina a completa e vision di Betico Croes.

Pabien pueblo di Aruba cu e logro di nos Papiamento etimologico y laga nos tur percura pa sigui papia y scirbi e idioma aki den forma corecto manera semper tabata e deseo di nos Libertador.

Y manera cu e mes a bisa: “Amor pa bo patria bo ta nace cune. Amor pa bo idioma vernaculo y materno bo ta nace y crece cune!”

 

 

 

Leave a Reply

Top