80% di doñonan di vehiculo di motor a cumpli cu nan belasting, pero ainda tin 15.228 cliente no a paga nada ainda pa cu 2017

Segun vocero di Departamento di Impuesto, sra. Meverly Romano, dunando un up-date di pagonan di numbernan di Aruba. Un 80% a cumpli cu dicho pago pa vehiculo di motor, di e 80% aki, 53% a cumpli na paga nan nomber di auto pa henter aña 2017.

Y 27% a cumpli cu pago di prome mitar di 2017. Esey ta bisa Departamento di Impuesto, cu mayoria di su clientenan a cumpli cu nan responsabilidad.

 

Banda di e 80% aki, Departamento di Impuesto por deduci cu 20% no a cumpli cu pago di nan belasting, cu ta representa 15.228 cliente cu no a paga net nada pa 2017.

Departamento di Impuesto ta trata na motiva e grupo aki pa tog cumpli cu nan obligacion finaniciero.

 

Den cuadro di e incumplimento aki, segun Meverly Romano, Departamento di Impuesto recientemente a saca un carta p’e clientenan aki 15 di mei ultimo, pa mustra cu nan no a cumpli ainda cu pago di nan belasting pa uso di nan vehiculo di motor. E fecha final cu nan por haci pago di nan debe, ta dia 29 di mei awor.

 

Departamento di Impuesto ta recomenda p’e cliente haci e pago na banco, cu ta mas facil pa nan mes. Si no haci e pago, e clientenan aki lo haya un cobranza adicional, di acuerdo cu e ley cu a cambia, cu ta haci Departamento di Impuesto lo haci e preparacionnan pa haci e cobranza adicional.

Si ainda no cumpli, Departamento di Impuesto lo haci uso di tur instrumento cu e por tin, pa cobra cu forza di ley, e.o. lo por pone un retencion riba salario.

 

Y asina por sigui, unda lo forza e cliente pa haci e pago, unda e.o. por haya un deurwaarder na bo porta, pa cobra. Hasta por bay asina leu, cu deurwaarder por pone beslag riba pertenecia di e debedor.

Esey a haci cu a bira sumamente druk na Departamento di Impuesto y tin otronan ta bay pa reclama tambe, cu nan a entrega e plachi di number y tog ta wordo cobra.

 

Algo cu ta sosode hopi ta, cu tin persona cu ta bende nan auto, pero no ta percura pa haci cambio di registro di nan number. Pesey si bo cumpra un auto nobo, bo mester percura cu p’e auto nobo ta debidamente registra cu un number nobo.

Ora di bende e auto, y laga e comprador nobo bay cu e number, ta bira fastioso, pasobra e doño nobo lo preocupa pa paga dicho belasting, e cuenta ta keda habri y e bendedor lo tin cu pagu’e.

 

Pesey ta bon pa haci e traspaso, y na Departamento di Impuesto tin formulario pa haci esaki, unda tur dos mester haci’e hunto.

Pasobra si e doño bieu tin cuenta habri, e mester cumpli cu esaki prome di haci e traspaso. Esaki ta algo hopi importante pa cada doño di auto tene cuenta cune.

Top