A base di resultado di eleccion na Corsou, Eugene Rhuggenaath lo bira e proximo Prome Minister di Corsou

Pueblo di Corsou a papia, unda cu e resultado di eleccion di diabierne ultimo, a keda demostra cu nan kier tranquilidad.

Nan kier un gobernacion di 4 aña y nan no kier mira mas bulador di cura.

Pesey mes, partido PAR cu Eugene Rhuggenaath a haci e diferencia, ora cu nan a resulta e partido ganador, cu 6 asiento.

PAR ta ser sigui pa partido MAN cu 5 asiento y MFK tambe cu 5 asiento, pero cu menos voto.

Esaki ta indicacion cu e proximo Prome Minister di Corsou lo bira, Eugene Rhuggenaath. Maske te n’e momento aki nos no sa si e t’e votgetter mas grandi di Corsou.

Segun conocedornan di materia politico di Corsou, ya ta papia di un Gobierno forma pa PAR, MAN, cu 11 asiento y pa fortifica e base, lo pidi sea PIN di Suzy Camelia Romer cu tin un asiento y/of cu partido Movemento Progresista di Marilyn Moses, cu tambe tin asiento. Si traha cu e dos partidonan aki, e proximo Gobierno por tin sosten di 13 asiento.

Esnan cu lo forma e proximo Gobierno, no ta mira pa traha cu MFK, ni tampoco cu Korsou di nos Tur di Amparo Santos. Tampoco lo traha cu Partido Soberano cu a saca un asiento.

Pueblo di Corsou asina a castiga e.o. PNP, cu no a haya ningun asiento, pasobra PNP su dirigencia no tabata kier pa Suzy Romer encabesa e lista y awe tin cu carga cu e consecuencia, di bira e gran perdedor despues di 65 aña di fundacion.

Omayra Leeflang di Un partido Husto lo no bolbe tampoco den Parlamento. Pa no papia mes di FOL cu a uni cu PAN, sin por a logra un asiento.

Top