A crea un aplicacion digital (app) pa raporta 24/7 sea cu video, potret of texto, cualkier actividad sospechoso

Sr. Jairo Boekhoudt, kende ta un cuidadano consciente y doño di su propio compania di investigacion y mercadeo, tambe tabata presenta diaranson ultimo, na e anochi caminda cu Minister Dowers a presenta e plan di maneho nobo.

Sr. Boekhoudt a wordo invita pa Minister Dowers, rib’e hecho cu sr. Boekhoudt a crea un aplicacion digital (app) compatibel cu smartphone, tablets y tambe computer di ambos plataforma, pa yuda cu prevencion.

 

Durante e anochi, sr. Boekhoudt a splica cu su persona a acerca Minister Dowers, pasobra cu el a sinti su mes yama pa contribui bek na comunidad y como cu e ta sinti su mes inspira pa e mandatario e kier aporta cu su conocimento.

Pa tal motibo su persona, por medio di su compania a haci un investigacion, pa saca afo si en berdad na Aruba e cuidadano ta sinti su mes insigur y tambe e motibo tras di esaki.

E sesionnan aki a tuma lugar cu varios categorianan di entrada, genero sexual, como tambe variedad den edad di e participantenan.

 

Segun sr. Boekhoudt cu el a haci e mesun ehercicio aki cu varios gruponan y a constata cu p. e. 7 di cada 10 persona na Aruba ta sinti nan mes insigur.

Pero cu apenas 2 di e mesun 10 personanan ey tabatin un experiencia directo pa cu criminalidad. E investigacion aki a conduci pa e compania di sr. Boekhoudt bay busca mas afondo y obhetivo, kico realmente ta e origen di e sentimiento di inseguridad y a discurbi cu tin varios factor ta hungando un rol grandi pa cu esaki.

 

Segun estudio haci, cu loke ta crea panico di inseguridad den e ser humano aki na Aruba ta cuminsa serca es nan riba social media, kende mayoria di bes ta ricibi informacion for di media y ta comparti esaki sin cu esaki ta wordo filtra y verifica cu autoridad competente prome. Rednan social den e era moderno aki ta hopi na moda y ta wordo uza pa causanan tanto bon como esnan menos bon.

Y como cu hopi bes a scucha Cuerpo Policial expresa, cu tin actividadnan sospecho cu ta wordo señala a traves di rednan social manera Facebook, cual medio no ta esun oficial, ta trece cu ne cu mayoria de biaha noticianan falso ta wordo crea y comparti, creando di e forma aki panico e inseguridad den nos comunidad.

 

Como tal, sr. Boekhoudt ta di opinion cu ta pa es motibo aki mes, cu el a yega na e conclucion y a papia cu Minister Dowers, pa hunto nan por introduci un aplicacion digital, caminda comunidad sea den un forma anonimo of no-anonimo, por haci uzo di comparti informacion cu Cuerpo Policial.

E plataforma digital aki cu yama preveni Aruba, ta den proceso di constucion y di prueba ainda. Pero loke esaki lo brinda na momento cu e ta completamente cla, ta cu e filtracion di informacion cu ta wordo suminstra, lo bay directamente na e departamentonan concerni y cu lo acapara informacionanan coherente. E ta asina cu e plataforma aki ta brinda e oportunidad di no unicamente comparti informacion di texto, pero tambe di potret of tambe video.

 

Banda di esaki tambe e plataforma digital ta brinda e posibilidad di un live chat, caminda cu bo persona lo por ta den contacto directo 24/7 cu e agente policialnan cu ta encarga pa ricibi e informacion y filtra e informacion.

Na final di e anochi aki, sr. Boekhoudt a ricibi un caluroso aplauso di e publico presente y mester remarca cu tur hende a keda encanta cu e tecnologia moderno aki, cu Minister di Husticia hunto cu sr. Boekhoudt lo introduci pa nos comunidad.

Leave a Reply

Top