A descubri un fraude grandi na Island Finance

For di algun dia caba, gerencia a bin ta haci un investigacion interno, ora cu a descubri cu tin hechonan iregular ta tuma lugar.

Ora cu e auditornan a descubri e forma con e fraude ta tuma lugar, a bay over na retira dos empleado di Island Finance, maske den prome instante nan a kere cu tin 4 empleado envolvi.

E hecho cu a retira te awor 2, no nifica cu no tin mas sospechoso envolvi.

 

Nos di AWEMainta a tuma contacto cu sra.Ivi Simon, CEO di Island Finance Aruba, kende mas  bien a keda sorprendi con nos di AWEMainta sa di e noticia aki caba.

No a keda Ivi Simon nada otro di admiti cu t’asina, pero den mesun rosea a laga sa cu ta dos persona so ta envolvi.

 

Ora cu nos a puntra, di cuanto placa nos ta papia di dje, Ivi Simon a bisa AWEMainta cu e lo yama nos bek, pero te na momento cu nos ta relata e noticia, nos no a haya un yamada, pa informa di cuanto suma ta trata cu e empleadonan aki a comete fraude y tampoco nos a haya sa e modus operandi di e dos empleadonan aki.

 

No ta prome biaha cu Island Finance ta bira victima di su propio empleadonan cu ta comete actonan fraudulento. Hopi biaha esaki a bin ta tuma lugar, pa cual ta surgi e pregunta, si no tin un control debido cu por evita e hechonan aki di tuma lugar.

No ta conoci pa nos tampoco, si gerencia a entrega un keho na Recherche pa persigui e personanan envolbi penalmente.

Top