A duna reconocemento na Ramon Todd Dandaré, Mag. Ling. pa su dedicacion na nos idioma Papiamento

Durante un anochi exitoso di e competencia di Arte di Palabra 2017 na Cas di Cultura, un anochi di declamacion y contamento di storia di nos hobennan, Comision Arte di Palabra Aruba, a duna reconocemento na dos persona cu a y ta contribui grandemente na nos idioma Papiamento.

Un baluarte, pa loke ta trata e lenguahe Papiamento, sigur ta Ramon Todd Dandaré.

 

E conocido linguista aki, naci na Colombia na 1942, a namora di e isla Aruba na 1952, ora pa prome biaha el a pone pia riba dje.

Su encanto cu e palabra, su zonido y e fonetica, a cristalisa na momento cu e hoben a logra termina su estudio di M.O. Spaans exitosamente, na Universidad di Amsterdam y na momento cu el a regresa cu e diploma den su maleta el a cuminsa duna les na Colegio Arubano y den su tempo liber e tabata duna L.O. Spaans na interesadonan.

 

Inkieto y cu deseo di supera, Ramon Todd Dandaré, a studia na Universidad del Valle na Cali y a obtene su grado di Magistrado Linguistico na 1975.

Asina el a inicia su carera na Instituto di Lenga Arubano pa 26 aňa. Desde 1985 e talentoso linguista a forma parti di miembro activo di Instituto Linguistico Antiano.

Su lucha pa reconocemento di Papiamento como lenga nacional a inicia desde 1967, no solamente pa Aruba cu a converti su mes den un isla riba su mes, pero tambe p’e islanan Curaçao y Bonaire.

 

Continuamente y incansablemente e baluarte aki a participa na diferente charla y conferencia y a publica un estudio tocante e lenguahe mistico y peculiar Papiamento. Como caracteristica di e baluarte aki sigur ta su don pa traspasa su conocemento y percura p’e idioma keda vital, bibo y consecuente.

Asina el a sa di dirigi cursonan di Papiamento di tres y di dos grado na Instituto Pedagogico Arubano y ta docente di Fonologia y Gramatica.

Tambe e tabata un di e docentenan cu a duna e curso di Corector di Papiamento na un grupo di empleado publico.

 

Na inicio di e decada di añanan 60 di siglo pasa Aruba a aparece riba mapa di e paisnan exportado di koffie mas importante di mundo, sin cultiva ni cosecha niun pipita di e planta.

Asina Ramon Todd Dandaré a skirbi su prome buki: E Negoshi di Koffie na Aruba: E ruta Colombia-Aruba-Merca y ta conta e magia comercial aki di exporta for di Aruba, un isla hancra den lama Caribe, un producto cultiva na 1.200 pa 1.800 meter riba nivel di lama.

 

E linguista Ramon Todd Dandaré, tambe a skirbi:“Historia di Diccionario y lista di palabra na Papiamento di 1829 pa 2014″. Un trabou di investigacion profundo y bon documenta cu e linguista Ramon Todd Dandaré a realisa.

Aruba ta orguyoso di e baluarte aki, un reconocemento sigur na su lugar. Pabien Ramon Todd Dandare y pabien Aruba.

Top