A logra 3 Oro, 8 Plata y 2 Brons den e Sur Americano di Niveles USAG na Bogota, Colombia

Recientemente e seleccion di gymnasia artistica di Aruba a biaha pa Colombia, unda prome nan a atende un campo di entrenamento hunto cu e seleccion di Liga Antioqueña y nan coachnan na ciudad di Medellin.
E campo di entrenamento tabata uno intensivo y di casi dos siman. Despues e seleccion di Aruba a biaha pa Bogota unda nan a competi pa prome biaha den un competencia internacional di nivel halto yama Sur Americano di Niveles USAG.

Mester bisa cu nos seleccion di gymnasia artistica bou guia di coach nacional Jimmy Palma a surpasa e expectativanan unda nos atletanan a logra un total di 26 medaya di cual nos a logra 3 medaya di Oro, 8 medaya di Plata y 2 medaya di Brons.
E otro medayanan nos atletanan a ricibi pa cay den premiacion den un of mas disciplina.

E medayistanan den e prome tres lugarnan sea Oro, Plata of Brons tabata Junaidy Odor, Sanne van Dam, Amika Every, Ashley Provence, Kim de Vries y Rebecca Spellen.
Tambe a logra conkista medaya Jesmea Jansen y Zara Clark den e All Around.

Un resultado grandi tabata e conkista den e All Around Champion Suramericano Nivel 5 p’e atleta Junaidy Odor kende a gana medaya di Oro den vault, mientras e ta logra medaya di Plata den Barra Asymetrica y Beam y un medaya di Brons den Piso.
E desaroyo positivo den e deporte di gymnasia cada dia ta mas bisto, e combinacion di e campo di entrenamento hunto cu e competencia aki a yuda nos atletanan di gymnasia artistica na un progreso den nan prestacionnan.

Es mas e atleta Rebecca Spellen a sigui un entrenamento special n’e campamento na Medellin p’asina prepara su mes debidamente pa competi n’e Panamericano de Aparatos cu lo tuma lugar dia 10 di augustus proximo.

Esaki ta un experencia y conocimento mas riba e materia aki, ta mihor so nos atletanan por bira di esaki.
Den dos aña cu nos atletanan ta compitiendo den exterior ta hopi premio caba nan a trece cas bek.
Lotto, e loteria di Aruba kier a felicita e seleccion di gymnasia artistica cu nan tremendo prestacion den e Sur Americano di Niveles USAG na Bogota, Colombia.

Leave a Reply

Top