A para tur buelo internacional: Gobièrno y InselAir a yega na un acuerdo

 

WILLEMSTAD – Diasabra mainta Gobièrno di Còrsou hunto cu accionistanan y gerencia di InselAir a anunciá cu nan a pone forsa hunto p’asina garantisá e conexionnan aéreo cu ta crucial pa Còrsou.

Esey a sosodé na momento cu gerencia di e compania a para tur buelo internacional y ta bulando solamente pa Aruba y Bonaire di acuerdo cu e pantaya oficial cu informacion pa publico.

Diabierne e avion cu mester a trece pasaheronan for di Miami no a bula y Inselair a contratá un compania di charter pa trece pasaheronan y hiba esnan cu tabata sperando nan salida pa Miami.  E dos buelonan a tuma lugar diabierne anochi lat.

 

Mientrastanto e acuerdo cu a sera diabierne ta pa haci InselAir financiera y operacionalmente salud y fuerte bèk. Partidonan a firma un acuerdo diabièrnè 27 di janüari caminda Gobièrno bou di cierto seguransa y condicionnan ta otorgá un fiansa di 33 mion florin na InselAir.

Pero ambos partido tin confianza cu e acuerdo cu a firma, cu ta resultado di còmbersacionnan sumamente intensivo, lo crea un bon base p’e meta cu kier alcansá.

 

Pa Gobièrno ta di importancia cu e acesibilidad y conexion for di exterior pa Còrsou ta keda garantisá, pero caminda seguridad semper ta na promé lugar.

A tene cuenta cu economia, generacion di divisa y empleo na Còrsou ta dependé di un alto grado di conexionnan aéreo confiabel cu paisnan den nos becindario.

Basá riba e acuerdo aki Gobièrno di Còrsou ta otorgá un fiansa di 33 mion florin, cu lo keda pagá conforme e ehecucion di un plan di stabilidad.

 

Como seguransa riba e fiansa, Gobièrno ta obtené e.o. e derecho riba propiedad (na Hulandes ‘pandrecht’) y usofructo (derechi di haci uso y sacando e beneficionan, na Hulandes ‘vruchtgebruik’) di 51% di accionnan den e companianan cu ta forma parti di InselAir.

Cu esaki Gobièrno ta obtené tur e derechonan di un accionista regular sin bira doño di e compania.

Gobièrno y e accionistanan actual di InselAir cada uno ta nombra dos comisario den e Hunta Comisario di InselAir.

 

E di 5 comisario, kende alabes ta ocupá e puesto di Presidente Comisario, ta keda nombrá conhuntamente.

E funcion di Presidente Comisario lo keda ocupá dor di sr. dr. José Jardim, economista y èx Minister di Finansa di Còrsou. Su experticio financiero y experencia gubernamental lo duna un gran aporte p’e restructuracion di e compania.

 

Banda di esaki e partidonan a palabrá cu e team di maneho lo keda fortificá cu dos director statutario, conforme proposicion di Gobièrno.

Esakinan t’e Presidente Ehecutivo y e Chief Financial Officier (CFO). E Presidente Ehekutivo ta guía e team di maneho y ta representá InselAir.

Sr. Gilles Filiatreault a keda apuntá como Presidente Ehecutivo. Sr. Filiatreault tin experencia internacional amplio den e industria di aviacion.

Sr. Gilles Filiatreault tin experencia práctico den su pais di orígen, Canada y tambe na Merca, Central y Sur America, region di Caribe, Europa Oriental y Wèst Africa.

Sr. Filiatreault a specialisá den inicio y restructuracion di companianan di aviacion, tanto pa loke ta trata transporte di pasahero y carga.

 

E team di maneho lo finalisá e plan di stabilidad pa fin di febrüari 2017. E plan di stabilidad aki lo tin cu mustra con InselAir por normalisá mas liher posibel, resultando den un compania lucrativo.

A base di e plan di stabilidad lo palabrá e detayenan di e financiamento, cu lo cana paralelo cu e ehecucion di e plan.

Un promé pago di 3 mion florin a keda pagá den luna di decèmber di 2016 como adelanto riba e acuerdo aki.

 

Diabierne a procesá e di dos pago di 5.6 mion florin pa luna di janüari 2017. Informacion adicional di e constelacion di e miembronan nobo di Hunta Comisario y tambe e team di maneho, a keda publica den articulo den e medio aki.

Top