A trece Museo Arkeologico den comunidad cu actividadnan pa 18 di maart

E aña aki Museo Arkeologico Nacioal Aruba (MANA) a haci uzo di e oportunidadnan en conexion cu celebracion di Himno y Bandera, pa trece e Museo mas cerca na publico.

  1. o. cu un ‘pop-up expo’ y festival Indjan den bario di Brasil, participacion na Ferianan Cultural y Carrousel na diferente scol basico y preparatorio y un exposicion temporario na Archivo Nacional Aruba cu publico por bishita ainda den e siguiente 3 luna.

Di e forma aki, grandi y chikito a disfruta di nos herencia cultural Indjan, den e periodo cu sala di exposicion di MANA ta cera temporario pa motibo di mantencion.

 

E siman a cuminsa cu e Feria cultural di scol preparatorio Washington, unda Museo a trece un “mini” festival Indjan pa e muchanan y nan famia cu a encanta pa haya ‘bodystamp’ cu replica di stempel di Indjan, a traha bunita “cadena di Indjan”, por a mira e cadena real di Indjan, como e piedra di mangaan di cual Indjan a traha nan pintura cora pa haci nan “bodystamp” y algun artefacto arkeologico mas den un exposicion simpel y temporario cu a trece na e scol pa e anochi cu gran acohida aki.

 

Despues a sigui cu presentacionnan na scol basico Pius X, como Emmaschool y scol basico Washington durante nan Carrousel Cultural na cual e alumnonan a haya e informacion di e Indjannan cu tabata biba na Aruba y a pasa pret ora den grupo a traha un puzzel cu mester a forma un potchi di Indjan. Museo ta hopi agradici na su boluntario Judmira Limonier, cu a duna un man p’asina logra haci e presentacionnan aki posibel. Danki tambe na e confiansa di e cabesante, juffrouwnan di scol y stagiares di IPA, cu a pidi Museo pa participa na e actividadnan educacional aki.

 

E atardi y anochi di 16 y 17 di maart, Museo a ‘pop-up’ na Centro di bario Brasil cu un exposicion temporario den tema di Shamanismo, rito y ceremonianan Indjan y a trece un parti di nos Festival Indjan pa mucha, hoben y adulto disfruta di dj’e. Riba e banner ilumina por a mira y a duna informacion tocante artefactonan ceremonial di cual e. o. e stempel Indjan, e ‘Tinkler’, un instrumento musical di Indjan y un amuleto den forma di un cara.

Bishitantenan a keda asina encanta pa haya nan ‘bodystamp’ cu un replica di e stempel Indjan di nos “shaman” pa e anochi “Beach Lama”, muchanan tabata orguyoso di a traha “tinkler” y un mascara mescos cu e amuleto.

 

Masha danki na nos boluntarionan hoben Jordan, Melany y Leonardo cu a traha hopi duro durante e anochi hopi bon bishita aki p’asina tur mucha por a traha nan obranan.

Un danki tambe na artista local “Beach Lama’ pa su rol di Shaman y pa su bunita ‘surprise performance’ y na Centro di bario Brazil, sra. Stella Lopes y sr. John Freddy Montoya pa e confiansa pa incorpora Museo den e celebracion.

 

Actualmente, Museo Arkeologico tambe ta forma parti di e exposicion temporario “Aruba ta nos tur” cu a habri dia 18 di maart na Archivo Nacional. Akinan Museo pa medio di un ‘Timeline’ cu artefacto arkeologico, historico y di awendia ta ilustra desaroyo di e prome habitantenan di nos isla te cu awe y cu algun ehempel ta demostra influencia di nos antepasadonan riba nos bida di awor. Museo ta desea di gradici Archivo Nacional Aruba pa e invitacion pa forma parti di e exposicion aki, sr. Fransisco Croes pa fia su herment historico y artista local Marian Abath pa fia su cadena di cralchi di glas pa e exposicion aki, como tambe Jair Britten cu hunto cu yiu Amanda, a duna un bunita presentacion di musica inspira pa Indjan, incorporando e ‘Tinkler’, un instrumento di musica di Indjan di Aruba. Keda pendiente pa mas actividad di Museo Arkeologico den barionan di Aruba den proximo periodo.

Leave a Reply

Top