ABBA Powerade Finals: ATCO Indians ta bin bek pa gana wega number 2 cu score di 10-9

 

POWERADE Play Off Final AA a continua cu partido number 2 di e best out of 7 riba diadomingo atardi 4’or, cu tremendo ceremonia caminda e himno nacional a wordo canta pa e hoben artista Eltienne Yarzagaray y e prome bala a wordo lansa pa e representante ehecutivo di Setar, Evan Giel. E catcher tabata e conocido locutor di Power FM, Ralph Maduro y e bateador tabata Aruba su prome big leaguer Eugene Kingsale.

Grupo di scout St. Paulus St. Michael tabata encarga cu e hisamento di bandera di Aruba. E cuerpo di umpire di e organisacion UNI a wordo lidera pa Ricardo Jimenez, na primera base Beto Grovel y na tercera base Roland Nicolaas.

 

ATCO Indians ta empata e series di best out of 7 ganando diadomingo 2 di april cu score di 10-9. E Powerade Player of the game a sali e pitcher di relevo di ATCO Indians Jonathan Tromp cu a drenta di relevo y silencia e bateadornan di Red Machine pa 2 inning y 2 tercio permitiendo solamente 1 hit y ta resulta e pitcher ganador di e partido tambe. Tromp un veterano di 13 aña den liga di AA ta duna su ekipo chens di bin di atras y gana e partido.

 

Richinel Matos cu a drenta di relevo pa Djurwin Croes a perde e partido. Matos sigur cu apenas 1 dia di descanso no a drenta den su miho forma. Croes di otro banda a tira hopi bon pa Red Machine y pone su equipo den posicion di gana e partido yudando su mesun causa cu un triple di 2 careda empuha pa empata e partido. Enrique Tromp ta conecta su di 2 homerun den 2 wega di Play off Final pa duna Red Machine e ventaha di 2 careda den di 7 inning pero ATCO Indians tabatin otro intension y ta anota 3 careda den cabes di 9 inning riba Matos y Julio Hernandez cu a releva Matos den di 9 inning.

Mihor bateadornan pa Red Machine tabata Julio Hernandez di 4-2, Jair Thompson di 5-2, Roderick Simon di 5-2, Djurwin Croes di 3-1.

Pa ATCO Indians tabata Darl Quandus di 5-2 cu 4 RBI, Joshua Ramada di 5-2, Garrick Oduber di 3-1, Jirvin Penja di 3-2.

 

E di 3 partido di POWERADE Play Off Final AA ta continua dialuna anochi pa 7:45 den stadion di Nadi Croes/Crismo Angela, caminda conocido locutor Ruben Garcia lo tira e prome bala pa inicia e di 3 partido y e himno nacional lo wordo canta pa e duo di Arelys Franken y Abigail Domacasse, grupo di scout St. Paulus Michael lo ta encarga cu e hisamento di nos bandera.

E partido nan por wordo scucha na Blue FM 107.5, Power FM 101.7, Guia Deportivo 95.1 FM, Cable TV canal 100, transmision en vivo di Sportszone Aruba cu naracion di Gregory Croes y Jairo Dirksen. Un danki special na ABBA su sponsernan cu ta haci e Play Off Final AA posibel, Tropical Bottling Company cu nan bebida POWERADE, Manpower 4U, WHM Latin America & Caribbean, Grill Time, Subway, SETAR, Dial Rent to Own y Bright Bakery.

Top