ABBA Powerade Finals: Red Machine ta sali campeon pa di 24 aña di nos baseball AA

E Powerade Final Series a continua cu e partido desicivo number 7 riba diasabra ultimo.

Den un Stadion Nadi Croes/ Crismo completamento yena cu fanaticada y den un wega yena cu emocion y batazonan, Aruba lo a bay conoce su Campeon.

 

E prome bala a wordo tira dor di Mito ‘Cocoyoco” Van der Biezen, representante di Umpirenan Uni y e himno a wordo canta pa e hoben Jonathan Croes, cu ta nos actual ganador di e festival di himno y bandera y tambe ex-rey di Dande.

Encuanto e partido mes, e ekipo di ATCO Indians a cuminza e partido cu tur intencion di captura e titulo campeon caminda den e prome inning, Jourick Blanco ta deposita e bala over di left field pa un homerun di 3 careda. Despues den di e 3 inning, Jourick ta bolbe bula cura cu un homerun di 2 careda pa hasi e wega 5-.0.

 

Tabatin tur indicacion cu e wega aki lo tabata cla. Pero e ekipo di Red Machine tabatin otro ideanan y ta haci un comeback increibel cuminsando den ceramento di 4 inning caminda nan ta anota 3 careda pa haci e wega 5-3, lidera pa un doblete di Kenny Hart.

Despues den di 5 inning, Red Machine ta bolbe score 3 careda pa haci e wega 6-5. Pero den di 6 inning, ATCO Indians ta reacciona y ta score 2 careda pa haci e wega cu contribucion di Darl Quandus y un triplete. Red Machine no ta baha cabes y den di 6 inning ta bolter e score atrobe ora cu Rolando Bido ta connecta un batazo di cuater skina pa e empata e wega na 7.

Pero esey tabata e cuminsamento, paso nan ta score 4 careda mas den inning, caminda ATCO Indians ta utiliza 3 pitcher, y Kenny Hart ta lidera e atake pa haci e wega 11-7.

 

Na final e score a termina 13-7 pa Red Machine y pues ta titula campeon tambe di nos baseball AA. Pitcher ganador a resulta Richinell Matos cu a cubri full e wega, y tambe a resulta di ta e Most Valuable Player di e Series ganando 3 wega. E player of the game a resulta di ta Kenny Hart cu empuha 6 careda den e partido aki.

 

Directiva di ABBA ta felicita Red Machine cu su di 24 titulo campeonil y tambe ATCO Indians cu nan sub-campeon. Ambos ekipo a duna tur loke nan tabata por y e ganador a sali e pueblo y fanaticonan di Aruba. Nan gosa un super series.

Un biaha mas pabien y danki na e pueblo cu a sa di bin apoya baseball local y e dos ekiponan aki.

Top