Accidente na Bushiri, unda e chauffeur ta laga su amigo atras herida den auto

Chauffeur ta perde control, ta dal contra un pal’i luz y un cura di cas, djey ta bandona sitio lagando e ocupante herida atras

Esaki a tuma lugar diahuebs marduga na altura di Great Ocean Minimarket na Bushiri. Mesora a manda Polis y ambulance n’e sitio.

Na yegada nan ta bin topa cu un persona herida y nan ta bin compronde cu e chauffeur pa un motibo of otro a perde control, a baha caminda, a dal contra un pal’i luz y despues a bay dal contra un cura di cas.

N’e sitio Polis ta wordo informa cu e persona herida t’e ocupante ya cu e chauffeur mes despues di e impacto fuerte, a bandona e sitio na pia.

Un patruya di Polis a bay tira bista den sercania, pero no a topa cu e chauffeur. Despues cu personal di ambulance a trata e ocupante n’e sitio a transport’e pa hospital.

Top