Accion di Bario Barionan Moko y Jaburibari a haya bishita di Prome Minister

Na cada cas cu Prome Minister Mike Eman a pasa diahuebs mainta durante Accion di Bario, el a wordo bon ricibi y e tabata atento manera semper pa loke e habitantenan tabatin di bisa.

Un di e casnan bishita tabata di Joaquin Vrolijk, kende a bisa cu basta tempo caba nan tabata preocupa cu e scuridad den e bario di Moko, pa cual e tabata un poco jaloers cada biaha cu e tende cu luz a wordo poni den cierto bario.

Sinembargo awe e ta contento pasobra el a scucha for di e propio mandatario cu luz ta yega na Moko tambe.

 

“Pa sorpresa mi a tende antayera di mi bisiña Chomon, kende a bisa nos cu ‘the man himself’ ta bin duna e noticia. Pa mi sorpresa ta net dilanti mi cas ta bin un poste di luz.

Esey ta yuda hopi pa combati y preveni criminalidad,” Joaquin Vrolijk a comenta. El a agrega cu e programa di Luz den Bario ta algo hopi positivo.

El a probecha pa combersa y elogia e mandatario pa trabounan cu su Gobierno a bin ta haciendo ultimo añanan pa Aruba.

 

Otro ciudadano manera Edna Lampe a probecha pa señala algun preocupacion di e bario, manera problemanan di medio ambiente.

El a bisa cu el a logra haya atencion di Prome Minister Eman, kende lo laga Departamento di Inspeccion di Medio Ambiente haci un evaluacion di e situacion pa por yega na un solucion.

 

Pareha Snoei di Hulanda, kendenan tin 17 aña bibando na Aruba tabata hopi entusiasma cu e bishita.

“Esaki ta algo cu nunca nos a tende di dje ni pasa aden. Na Hulanda nunca un mandatario a bishita nos,” sra. Snoei a bisa cu un sonrisa riba su cara.

“Nos a bin aki p’e forma di bida na Aruba y e hendenan ta hopi cariñoso.”

E ta admiti cu Aruba a cambia masha hopi for di tempo cu nan a yega pa awor, e hendenan a keda mesun cariñoso, pero e isla si a desaroya hopi.

“Centro a bira masha bunita mes,” Dirk a bisa.

 

Durante e bishita den Jaburibari y Moko, e mandatario a wordo compaña pa Darren Kelly, Lauren Flanegien y Simeon Arends.

Kelly na final di e caminata a splica cu e ta contento con e bario a ricibi e mandatario, y cu nan a haya chens pa expresa nan pensamento y duna idea riba cierto desaroyo pa nan bario y isla.

Pa Darren Kelly un di e proyectonan di mas grandi cu e ta admira ta esun di Linear Park.

Un parke grandi, un di esnan mas grandi den Caribe, unda cu e ciudadanonan por haci ehercicio y mantene nan curpa den forma sano.

Pero pa centro di ciudad tambe nan tabatin elogio, ya cu e cambionan a haci cu e centro di ciudad a keda masha bunita.

Nan a gradici e mandatario pa su bishita y encurasha Prome Minister Eman pa sigui cu su caminatanan den bario y mantene un comunicacion directo di e forma aki.

 

 

Top