Actividad Fundacion Special Olympics Aruba y un grupo di turista runners a bishita Aruba cu e cruiseship Adventure of the Seas

Seis luna pasa sr. Tuyo Werleman, presidente di Fundacion Special Olympics Aruba, a wordo acerca dor di un grupo di coredo, yama “Leave a footprint”, pa organisa un caminata pa nan di 5 y 10 kilometer, ora nan yega Aruba dia 2 di maart di 2017. E grupo ta consisti di 30 coredo.

 

Tur preparacion a wordo haci, y ayera diahuebs, pa 8’or, nos a busca e turistanan na e barco Adventure of the Seas, nan a subi bus y nos a transporta nan pa Hamaka, dilanti Talk of the Town. Eynan nan a wordo ricibi pa e tres miembronan activo di e directiva di Special Olympics Aruba, y 12 atleta special y habitantenan di Cas Shabururi. Dor cu e parti west di Linear Park ainda tin tent, ta yen di sushi, y toiletnan holiendo masha malo, a dicidi di uza e parti oost di Linear Park.

Pa 8’or e coredonan a sali, algun canando otro coriendo, a bay na e punto di regreso, cu tabata banda di Cuerpo di Bombero di aeropuerto. Algun coredo a core e ruta dos biaha pa completa e 5 kilometer. Rib’e ruta tabatin stands di awa. Na Hamaka e coredonan por a disfruta di patia, bacoba, boter di awa y Gatorade.

 

A sigui un seccion di saca potret dor di nos fotografo y dor di e drone di sr. Richard Lacle.

E bishitantenan a ricibi di Special Olympics varios regalo, cu a wordo duna dor di sra. Netty Williams. E. o. nan a haya un rugtas di Digicel, un serbete di Digicel, (cortesia di Digicel) pin di Special Olympics Aruba, un t-shirt di Special Olympics torchrun 2016.

Nan a saca potret tambe na e Aruba grandi dilanti Hamaka. E drone tambe a saca potret.

E turistanan y e atletanan special a gosa hopi y a expresa cu e actividad ta un fiesta pa nan.

E grupo di turista a entrega un donacion na Special Olympics Aruba. Special Olympics a ofrece nan un tayo cu e imagen di un mata di Divi Divi y cu e insigna di Aruba, como recuerdo.

 

Pa 10’or e bus a bin busca nan pa sigui disfruta di nos isla. Gradicimento ta bay na e miembro nan di directiva di Special Olympics activo, cu ta Jeanette Netty Williams, sr. Doy Bernabela, sr. Karel Williams, na e boluntarionan sra. Arelis Croes y sra. Patricia Faro.

Un danki na nos sponsornan cu ta Digicel, Cheng Supermarket na Bubali, y sr. Virgilio di Fruteria Virgilio.

Danki special na sr. Richard Lacle pa uza su drone pa e actividad y na sr. Kevin van Ommeren di Hamaka pa facilita nos uza di su luga. Tambe un danki na sra. Vanessa Tromp di SPO St. Cruz, su esposo y yiu, cu a bin topa e turistanan, pa cual el a yega di organisa un run den pasado, y a join nos team.

Leave a Reply

Top