Acto bergonsoso den Parlamento di Corsou Parlamentario Jacintha Constancia a pasa su colega Giselle McWilliam un wanta basta duro

WILLEMSTAD – E proceso di drecha bida cu Jacintha Constancia pasa aden aparentemente no a duna resultado, pasobra despues cu Constancia a bautisá bira Cristian, pero su actuacion ayera tabata tur cos menos Cristian.

Ministerio Publico a tuma nota di e aconticimentonan den Staten ayera.

Relacioná cu esaki Procurador-General (PG) a ordená Landsrecherche Corsou pa inicia cu un investigacion penal.

 

Miembro di Parlamento, Giselle Mc William mientrastanto a presentá na Landsrecherche Corsou pa haci denuncia, cu n’e momentonan aki ta ser procesá. Miembro di Parlamentu Rozendal tambe a haci un denuncia contra sra. Jacintha Constancia. Den e caso aki pa menasa.

Miembro di Parlamento, Jacintha Constancia a keda detene “op heterdaad” relacioná cu maltrato y ta den custodia actualmente na Landsrecherche Corsou pa ser scuchá como sospechoso.

E investigacion penal ta andando.

 

Tabata ayera durante e reunion caminda lo a bay discuti e proposicion pa posponé eleccion, sra. Giselle McWilliam a criticá fraccion di MFK severamente y tabata ora Constancia a tende Giselle ta papia, el a lanta bay den sala y dal Giselle McWilliam di traicion.

E problema ta cu pa agresion den Parlamento no tin sancion, pero Jacintha Constancia a imponé su mes sancion anunciando su retiro for di Parlamento.

 

El a declará cu e ta lamentá loke a pasa, pero cu e lo pidi McWilliam personalmente disculpa, pero for di awor ta conocí cu esey lo ta altamente dudoso, esta cu MacWilliam lo aceptá disculpa di Constancia.

Constancia a splica cu e no kier pa rivalnan di su partido lo usa e incidente pa core campaña contra su partido cu e suseso aki.

El a anuncia cu e tambe lo entrega un keho p’e daño verbal y nonverbal cu Gisell Mc William a hiba contra dje.

 

Mientrastanto den Parlamento tabata sumamente bergonsoso mira con coleganan masculino a cana pasa riba Giselle Mc William sin haci caso ni mustra comprension.

E lider di MFK, Gerrit Schotte, a cana duro bay y no a demostra ningun tipo di interes pa mustra su compasion y mesora e Parlamentario Elsa Rozendal a grita cu e cos aki ta inaceptabel.

 

Mesora Pik Pisas a schòrs e reunion y e discusionnan a sigi pafo di Parlamento.

E suseso a sacudi Corsou, pasobra ta prome ´biaha cu dos Parlamentario femenino a haña nan envolvi den un incidente violento asina.

For di mainta e ambiente den Parlamento tabata masha hostil, pasobra basicamente e proposicion di e grupo di 12 cu ta den mayoria ta pa posponé of cancelá e eleccion di 28 di april proximo.

Igualmente e tono tabata hopi ordinario cu e tipo di Parlamentarionan cu tin na Corsou actualmente.

 

 

Loke a enfuresé Constancia ta pasobra Giselle McWilliam a provocá Constancia casi calificando Constancia como un muher sushi, pero Constancia a bira realmente brabo ora el a mencioná e escandalo di Monkapje di BZV pa yuda saco di su casá e tempo ey. (Mientras tanto Constancia a divorciá).

 

E escandalo di Mondkapje ta caminda a paga algun 100mil florin sin cu e material a yega Corsou. No tabatin destaho publico den e caso aki.

 

DENUNCIA

Giselle Mc William a manera mencioná anteriormente, a haña slá duro cu a resoná den e edificio di Parlamento y tabata tur na sanger.

Mc William a desbaratá e argumento di e coalision nobo di 12 cu ayera mainta tabata incompleto y esey a enfuresé fraccion di MFK y Pueblo Soberano por igual.

Mientrastanto e suseso practicamente a paralisá e supuesto mayoria di 12, pasobra e miembro di Soberano, Leonora ta di vakantie n Mediteraneo y Constancia por lo pronto lo no bay Parlamento y pa nombra un re-emplazante lo tuma su tempo.

Top