Acusado ta traumatisa pa su siguridad

Diahuebs a presenta den Corte un homber  di 26 aña, kende ta traumatisa pa su siguridad pa cual a busca un arma di candela pa defende su mes. E tin asina hopi miedo, hasta awor cu e ta den prizon, cu el a pidi pa e sinta su castigo na Hulanda.

Ta trata aki di M. Felix di 26 aña, kende tin un castigo pendiente tambe di posesion di arma di candela, cu ta data di februari 2016 y pa cual el a haya un castigo condicional di 7 luna.

E mes ta bisa cu e tin e arma aki pa su siguridad y defende su mes. “Mi no tin plan pa bay use contra un persona riba mi mes,” el a bisa diahuebs mainta den Corte. Tur e situacion di awor ta debi na e hecho cu e tabata forma parti di un gang y dado momento el a dicidi di sali. Esaki a causa cu e tin miedo cu nan lo tuma vengansa contra dje.

Segun fiscal, un homber a aserca Polis pa informa nan cu un homber bisti na colornan di camuflahe a menase y ora cu nan a bay busca rond a topa cu e acusado aki. Fiscal a bisa cu un arma normalmente mas barata por ta 500 dollar y por tin hasta di 1500 florin, ora nan wordo cumpra ilegal.  Den caso di e acusado aki, ta e di dos biaha cu e ta hay’e envolvi pa un delito asina. Awor el a comete e mesun delito y den su periodo di prueba. Pesey a pidi pa condene na un castigo di 7 luna y ehecuta e sentencia di aña pasa tambe.

Su Abogado mr. Thielman a bisa cu e no ta bay perde tempo pa trece storianan bunita pasobra su cliente a admiti cu e tabatin e arma y pakico. Tambe nan sa cu loke el a haci no ta corecto, pero e tabata tin’e pa defende su mes. El a señala por ehempel cu e prome biaha cu e caso a bini dilanti, e motibo cu su cliente no a presenta tabata pa miedo. E tabatin miedo pa pasa e pida area den KIA pa yega na e Van, unda cu no tin “beveiliging”. Pa e tratamento di su caso awo, el a pidi pa siguridad pa e por yega na e bus cu ta transporta nan. Mirando su situacion tambe, el a pidi cu si e wordo condena e por sinta su castigo na Hulanda. Riba esaki fiscal a contest’e cu ta keda na su persona pa haci e peticion necesario.

Pa Corte a keda proba posesion di arma y Hues a bisa e acusado cu e delito aki ta uno hopi serio. E ta trece insiguridad pa su mes y pa otronan. Por mira cu el a saca e arma riba caya. “Bo ta bisa cu bo a adkiri e arma pa defende bo mes, pero tin hopi otro forma di haci esaki. Bo por a bay bek Hulanda enbes di cumpra arma,” el a bise. E acusado a nace na Hulanda y diferente biaha a bay Hulanda pa establece su mes pero a bolbe Aruba.  E Magistrado a tene cuenta cu recientemente caba el a wordo condena pa posesion di arma. El a wordo condena na un total di 27 luna, esta e castigo bieu mas e nobo.

Leave a Reply

Top