Acusado treci Corte geboei na man y pia

Un di e acusadonan cu a presenta diabierna dilanti mesa berde tabata e homber G.J. Kelkboom, kende tabata geboei na man y pia. E tabata mustra un persona nervioso. Tabata trata aki di O.M.B. V di 36 aña.

E acusacion contra dje ta cu el a trata di kita bida di un persona cu premeditacion, door di wanta e persona aki cu forsa y a tene un serbete muha cu ammoniaco na su boca y nanishi pa basta rato y djei a hinca dos dede den boca di e persona aki, kende tabata su compañera. E hecho aki a tuma luga dia 22 di juli ultimo. Resumiendo e ta wordo acusa di intento di asesinato, pero tambe intento di maltrato pisa.

E caso a wordo trata estilo Proforma pasobra Fiscal a pidi pa pospone su tratamento, aunke cu esaki no a cay na agrado di e acusado.

Fiscal tabata kier haya un rapport riba investigacion cu a wordo haci riba e likido cu tabatin riba e serbete y ki efecto e substancia aki tin riba un persona. Tambe el a pidi un rapport di Reclassering. Pa tur esaki e mester di tempo.

E acusado via di su Abogado a bisa cu e kier pa e caso sigui pasobra e kier sa con e ta para, si e tin cu keda sera of ta bay cas. Aunke su Abogado mes tabata di acuerdo pa e wordo posponi, pero no mucho largo, ya cu el a haya e rapport psychologico na ultimo ora y no a logra repase ni cu su cliente debidamente.

Prome cu Huez a tuma un decision riba peticion di e fiscal, e Acusado a splica cu “nunca tabata mi intencion pa mata mi señora y mi ta pidie pordon,”, pero na e momentonan ey e señora a bandona e sala caba.

Hues a dicidi cu dia 9 di februari awo pa 9’or di mainta lo sigui cu tratamento di e caso.

Leave a Reply

Top