ADECK expandiendo den Caribe Acuerdo di cooperacion firmá entre Còrsou y República Dominicano

WILLEMSTAD – Den oficina di Cònsul di República Dominicano na Còrsou a tuma lugar diamars último firmamento di un acuerdo di entendimento entre ADECK; e Asociacion di Empresa(rio) Chiquíto y Mediano di Còrsou y Cámara di Comercio Hulandes na República Dominicano.

E acuerdo ta basá riba intencion pa promové inter-relacion di comunidadnan empresarial interesá den haci comercio y invertí den esaki entre República Dominicano y Còrsou.

 

Tambe pa realisá estudionan, coordiná actividadnan y recomendá respectivo Gobièrnonan pa yega na cooperacion económico, comercial, tecnológico, cultural y turístico; entre e dos paisnan.

Deseo ta tambe pa promové asistencia técnico via di intercambio mutuo di informacion comercial y tecnológico entre e dos paisnan.

Mester organisá tambe programanan di apoyo sectorial pa desaroyo mutuo di sectornan manera  agricultura, beyesa y bienestar, tecnologia di informacion, industrianan creativo; e.o. sectornan cu ta di tur dos su interes.

Y tambe desaroyá actividadnan relacioná cu promocion di comercio y cooperacion económico entre tur dos pais, cu atencion pa deporte usando técnica di clùster pa logra e meta.

 

Taiana Mora, kende ta Presidente di Cámara di Comercio Hulandes na República Dominicano a bisa cu a yega asina aki na un acuerdo cu ta bay sirbi Còrsou como República Dominicano.

E ta mira hopi posibilidad sigur pa loke ta comercio di agricultura.

 

Presidente di ADECK, Wilbert Geertruida a bisa cu e ta mira esaki como un bon reto cu ta yuda Còrsou sigur pa loke t’e parti di agricultura.

‘Nos ta haciendo e esfuerso aki p’e sector y nos ta bay duna tur loke nos tin di nos mes’, segun Geertruida.

 

Cònsul General di República Dominicano na Còrsou Francisco Francisco a bisa di ta sumamente contento cu tin un acuerdo asina aki y mas ainda cu e firmamento a tuma lugar den su oficina.

‘Pa nos tambe 2017 ta un aña di hopi reto y nos kier p’e acuerdo aki logra ya cu nos ta sinti nos mes famia cu Còrsou’, asina e Cònsul a bisa.

E acuerdo a keda firmá pa Wilbert Geertruida di ADECK y Taiana Mora di Cámara di Comercio Hulandes di República Dominicano.

 

Riba e potrèt por mira di robes pa drechi Cònsul di República Dominicano na Còrsou Francisco A. Francisco, Taiana Mora di Cámara di Comercio Hulandes di República Dominicano y Wilbert Geertruida di ADECK.

Top