Aerolineanan mester tin un miho comunicacion

Den fin di siman basta persona (pasahero) a keda perhudica pa un mescla di ekipahe cu tabatin na Corsou. Tur esaki por a wordo evita si tabatin un miho comunicacion entre aerolineanan, cu lo haci cu e servicio ta wordo beneficia.

Diadomingo den oranan di atardi tabatin dos vuelo cu mester a sali for di Corsou pa Aruba, esta Insel Air y Aruba Airlines. Tur cos a bay bon te ora cu e avionnan a yega Aruba y pasaheronan mester a bay busca nan ekipahe, cu no tabatin fin pa caba di yega.

A resulta cu na Corsou, trahadonan a pone e ekipahe di pasaheronan di Insel Air riba e avion di Aruba Airlines cu a transporta esakinan pa Aruba. Pero e trahadonan cu a bay busca ekipahe di Insel Air y a constata cu e maletanan no ta di e empresa, a dicidi di no hinca nan den avion. Tabata simplemente pa averigua si esnan di Insel a wordo poni abordo di Aruba Airlines, y a cambio nan por a trece esnan di Aruba Airlines. Pero esaki no a sosode.

E pasaheronan di Aruba Airlines a keda perhudica y te dialuna mainta mester a bay aeropuerto bek pa busca nan maletanan. Sigur un mal experencia. Entre e grupo perhudica ta e muchanan di Aruba cu a sali campeon den un competencia di Taekwondo na Corsou.

Leave a Reply

Top