Aeropuerto di Aruba ta “Highly Commended” pa excelencia den mercadeo di Aeropuerto

Durante un anochi excepcional di networking na Drai’s situa na The Cromwell Las Vegas Hotel & Casino cu anfitrionnan McCarran International Airport y Las Vegas Convention and Visitors Authority, Aeropuerto di Aruba a keda premia “Highly Commended” pa excelencia den mercadeo di Aeropuerto den e categoria di aeropuertonan cu ta sirbi menos cu 4 miyon pasahero.

 

E premio a wordo orguysamente ricibi dor di AAA N.V. su Air Service Development Manager, sra. Jo-Anne Arends y sra. Barbara Brown, Chief Commercial Officer di AAA N.V.

Aeropuerto di Aruba a wordo nomina p’e Airport Marketing Award hunto cu Bonaire International Airport, Curaçao International Airport, Regina International Airport (Canada), Skyxe – Saskatoon Airport (Canada).

E Routes Awards anual ta wordo considera como e award mas valioso den e industria, pasobra e votacion y huzgamento ta wordo haci dor di e comunidad di airline network planning.

 

Nan ta brinda e comunidad di aerolineanan cu e oportunidad pa nan tin algo di bisa cua aeropuerto nan ta sinti cu ta brinda e mihor servicionan di mercadeo general na nan, sea ta tocante nan relacion en particular, resultado efectivo, provision di data y informacion of tecnicanan inovativo pa desaroya of mantene un ruta existente.

 

Mas di 650 profesional di aviacion a wordo treci hunto pa presencia e presentacion di premio y pa forma parti di e di 9 Routes Americas – e evento pa desaroyo di ruta mas grandi pa full America.

E nominacion- y premionan ta un “benchmark” pa Aeropuerto por monitoria con nan ta haciendo compara cu e competencia, mirando cu aeropuertonan ta ta haci tur cos posibel pa complace e industria aereo.

E premio aki ta un bon manera pa aeropuerto tin un reconocimento valido cu e por orguyosamente comparti cu su cliente- y stakeholdernan.

 

“Esaki ta un reconocimento fantastico un biaha mas di e logro di nos ekipo di Airline Marketing den e ultimo aña. Despues di a gana aña pasa den nos categoria, pa sigui wordo reconoci pa nos esfuersonan dor di otronan den e industria ta duna un satisfaction grandi y ta motiva nos pa sigui cu e bon trabou cu nos ta haciendo,” asina CEO di AAA N.V., James Fazio a bisa.

Leave a Reply

Top