AFL. 70.000,00 reparti dor di Quota International of Aruba na nos comunidad!

 

Recientemente, Quota International of Aruba a tene su anochi di donacion y a haci entrega di donacion na varios instancia na Aruba cu ta traha na beneficio pa nos comunidad.

 

E anochi grandi aki Quota International of Aruba, a reparti un suma grandi di total di

Afl. 70.000,00 entre un total di e 23 instancianan aki na Aruba cu e fondonan recauda durante Quota su evento anual exitoso, esta Quota su Picnic Dansant y cu a hiba e tema di “Quota Goes Safari.”

 

Quota International of Aruba ta un club di servicio consistiendo solamente di hende muhe ehecutivo cu ta traha boluntariamente pa yuda instancianan cu ta traha cu personanan cu limitacion di oido, hende muhe y muchanan den situacionnan di abuso y esnan mas vulnerabel den nos comunidad.

 

Durante henter aña ta organisa eventonan, seminario y campañanan pa conscientisa nos comunidad di Aruba di e problemenan di zonido duro pa oido di hende, y tambe ta ofrece asina diferente oportunidad pa test nan oido gratis durante e siman tan conoci, “Siman di Kibra Silencio, Cuida Bo Oido.” Quota tambe ta aporta na conscientisa y educa nos comunidad cuminsando for di nos muchanan por medio di nan proyectonan anual.

 

E organisacionnan cu a ricibi un donacion e aña aki ta varia y ta segun e diferente categoria cu ta cay bou di locual cu Quota International of Aruba ta dedica na dj’e y ta lo siguiente: esnan cu  deficiencia di oido y habla; esnan cu ta mas vulnerable den nos comunidad, esta hende muhenan den dificultad, muchanan, hobennan y nos grandinan; esnan desafortuna cu limitacion incapacita social y fisico,; conscientisacion y desaroyo di formacion intelectual di nos muchanan y hobennan, na nivel local, internacional; y alavez pa contribui y aporta positivamente na e cuido di esnan cu ta sufri di e enfermedad cancer.

 

Siguientemente e instancianan cu a ricibi un donacion di acuerdo cu e categoria cu nan ta cay den dj’e ta: FEPO, Stichting Geluids Overlast, Wit Gele Kruis, Scol Scucha Nos, Fundacion pa Hende Muhe den Difficultad, Stichting Casa Cuna Progreso, Stichting Adopt an Addict, Stichting Sociaal Fonds Colegio Arubano, Sociaal Fonds Colegio Arubano San Nicolas, Scol Paso pa Futuro, Scol Practico pa Ofishi, FAVI, Funari Sonrisa, Fundacion Respetami, Fundacion pa Nos Muchanan y Heart-Centered Leadership Foundation y FADA, ATHA, Biblioteca Nacional Aruba, Ban Uni Man pa Cria nos Muchanan, Fundacion Edmund Harms, Kaboutergroep Jeanne D’Arc y Koningin Wilhelmina Fonds.

 

Durante un anochi ameno na Universidad di Aruba, e representantenan di e diferente instancianan y organisacionnan a bini hunto p’asina nan por a ricibi nan cheque for di man di sra.  Gwendeline van Trikt-Rojer, presidente di Quota International of Aruba, conhuntamente cu sra. Zethsia Lacle, cual tabata e lider di e Comision di Donacion y alavez e Maestra di Ceremonia pa e anochi aki, y tur miembronan di Quota International of Aruba cu a traha duro pa e bunita y gran logro aki.

 

Rib’e anochi special aki tambe Quota a honra sr. Bert de Vries, di Optica Oduber & Kan N.V. cu un gesto especial di reconocemento y aprecio pa su aportacion y donacion special na Quota Club Aruba. Optica Oduber & Kan N.V. ta un patricinado fiel, conhuntamente cu nan super staff, a cumpli cinco aña consecutivo y ta sostene Quota su causa y campaña anual di “Cuida Bo Oido”, especialmente durante “Siman Kibra Silencio”, pa nos comunidad por haya un oportunidad pa haci un test di oido gratuitamente.

 

Na final di nochi, representantenan di instancianan a hiba palabra pa gradici Quota y a comparti y duna testimonio di tur locual ta e retonan y situacionnan cu nan ta encontra y tin cu enfrenta den nos comunidad y ta expresa cu tin hopi necesidad pa ayudo.

 

Quota International of Aruba ta gradici henter nos comunidad pa semper sa di contribui y apoya Quota, y ta invita henter comunidad atrobe pa nan sosten pa recauda fondo pa e bon causa.

 

Pa Quota sigui duna bek na nos comunidad, Quota ta organisando nan evento anual di recauda fondo, esta e famoso y fabuloso Quota Picnic Dansant cu lo tuma luga diadomingo, 11 di juni 2017. Asina ta, Quota ta invita tur hende pa prepara pa disfruta un biaha mas, cu un super dushi fiesta y asina bo tambe ta aporta na bienestar di nos comunidad cu tin tanto mester di nos yudansa.

 

Interesado pa contribui na yuda Quota yuda Aruba, por tuma contacto cu tur miembro di Quota, sea por manda email na qia.secretary@gmail.com of laga un respondi rib’e pagina di Facebook: Quota International of Aruba.

Top