Age Bakker (Cft): “Sint Maarten mester pone prioridad p’e inversionnan cu Gobièrno kier haci”

PHILIPSBURG – Durante su bishita recien na Sint Maarten, Colegio di supervision financiero (Cft) a hiba còmbersacion cu Minister y miembronan di Parlamento tocante di e situacion financiero di e pais.

Na 2016, pa promé bes for di 10-10-’10, Sint Maarten a realisá un surplus riba su presupuesto. Cu e surplus aki, tal manera e instruccion dirigí ta stipulá, lo compensá e déficitnan di e añanan anterior.

 

E resultadonan exacto lo bira conocí ora cu e cuenta anual di 2016 keda producí. E presupuesto di 2017, pa cua Cft a duna un conseho positivo, lo sigui contribuí na compensacion di e déficitnan di pasado y na eliminacion di retrasonan den pago, principalmente na SZV y APS.

Cft a papia cu Gobièrno tocante e necesidad di stipulá claramente e prioridadnan p’e inversionnan di capital, usando un fiansa cual lo no mester surpasá e montante di ANG 30 mion.

 

E presupuesto aprobá di 2017 cu un montante total di ANG 478 mion te ainda ta contené algun reto.

Mas cu tabata e caso den e añanan recien, e presupuesto aki ta dependé di entradanan incidental.

P’esey ta necesario pa monitòr e presupuesto den un forma estricto. Cft a pidi Gobièrno pa realisá e entradanan incidental mas tempran den aña, pa di e forma aki evitá inseguridad tocante factibilidad di e presupesto mas lat den aña.

Cft ta consehá pa usa un asercamento mas structural cu ta enserá e.o. un maneho cla di dividendo pa entidadnan di Gobièrno, di moda cu e presupuesto ta bira mas sostenibel y tambe mas previsibel.

 

Tal maneho di dividendo lo mester tene cuenta si cu e plannan stratégico di negoshi di e entidadnan, e proporcion di solvabilidad cu nan ta aplicá y e capacidad cu e entidadnan tin pa por paga dividendo.

E reportahe di ehecucion di e último kwartal a mustra un surplus presupuestario di ANG 26,4 mion den 2016; un montante cu a resultá ANG 1,1 mion mas halto cu loke originalmente a keda presupuestá.

 

Un parti significativo di e entrada aki, incluso un pago di un solo bes di compania di utilidad GEBE, a keda realisá den e di 4 kwartal, loke a compensá e déficit cu tabatin durante di aña. Lo usa e surplus principalmente pa eliminá retrasonan den pago.

Cierto problema cu e sistemanan administrativo ta pone cu ta existí e posibilidad cu ainda lo por tin adaptacion den e resultado final.

P’e motibo aki Cft ta consehá Gobièrno pa finalisá e cuenta anual di 2016 y laga accountant audit esaki mas liher posibel.

 

Durante su bishita na Sint Maarten di 27 te cu 30 di maart, Cft a reuní cu Gobernador, Minister di Finansa, Minister di VSA (Salubridad, Desaroyo Social y Trabou), Conseho di Minister, Comision Financiero di Parlamento, APS y Post Sint Maarten (PSS).

Gobièrno di Sint Maarten na febrüari a informá Cft tocante e progreso mas recien cu el a logra realisá pa loke ta trata e instruccion dirigí cu Conseho di Minister di Reino a duna e pais na 2015.

 

Cft a informá Conseho di Minister di Reino cu Sint Maarten ta cumpli suficientemente cu e instruccion, di moda cu ta posibel p’esaki haci un peticion pa inversionnan di capital. Sinembargo lo tin e condicion pa Cft haña mas bista den e plannan di inversion y e gastonan planeá, promé cu e Colegio por evaluá futuro peticionnan pa fiansa.

 

Ademas Gobièrnu lo mester stipulá prioridad p’e gastunan di capital dentro di e montante acordá di ANG 30 mion, di moda cu e proporcion entre e nivel di debe y e producto nacional bruto (GDP) ta keda n’e nivel actual.

Cft a papia tambe cu e Minister tocante di e plannan di modernisacion di Oficina di Impuesto, incluso e posibilidad pa ofrecé servicionan online y e intencion pa stimulá un cultura di cumplimento cu obligacionnan di pago di impuesto.

 

Dentro di e instruccion dirigí di Conseho di Minister di Reino, a pidi Sint Maarten tambe pa introducí legislacion cu lo haci e sistema di cuido y esun di pensioen financieramente sostenibel den futuro.

Tur partido enbolbí a firma un convenio pa reforma di e sistema di pensioen y tambe pa hisa e edad di pensioen te 65 aña.

Esaki lo yuda APS drecha su nivel di cobertura, miéntras cu e primanan ta keda na un nivel pagabel.

E intenshon ta p’e legislacion relevante keda cla promé cu e di dos mitar di e aña aki.

 

Trahamento di legislacion pa introduccion di un seguro médico nacional ya ta andando, aunke e implementacion efekcivo lo tuma algun tempo ainda.

Cft a consehá Gobièrno pa mantené tur partido cu ta enbolbí den e proceso constantemente informá di tur desaroyo.

 

Cft a papia cu Post Sint Maarten y Gobièrno tocante e necesidad pa traha un plan di accion cla, cu kual lo mester restaurá viabilidad financiero di e compania y reducí e riesgonan cu esaki ta representá p’e presupuesto di Sint Maarten.

 

Den su còmbersacionnan cu Parlamento, Cft a pidi pa realisá mehoransa cu atendemento di e cuentanan anual di 2013, 2014 y 2015.

En general a realisá mucho tiki progreso pa loke ta trata mehoramento di e maneho financiero.

 

 

Top