Age Bakker (Cft): “Ta bay atendé cu problema di capacitacion di Departamento di Finansa di Sint Eustatius”

ORANJESTAD – Durante di e bishita di Colegio di supervision financiero Bonaire, Sint Eustatius y Saba (Cft) na Sint Eustatius, Colegio Ehecutivo a duna un splicacion extenso cua t’e decisionnan cu a tuma pa atendé di un manera structural cu e problemanan di capacidad di Departamento di Finansa.

E Colegio Ehecutivo tin e intencion di contratá un oficina externo pa no solamente haci e administracion financiero, pero tambe pa duna entrenamento n’e trahadornan di e departamento.

 

Segun Presidente Age Bakker: “Pa basta tempo caba Cft a bin ta pidi atencion p’e problemática aki. Tin indicacion cu awor ta trahando seriamente pa yega na un solucion”.

Durante di su bishita dianan 28 y 29 di maart di Sint Eustatius, Cft a reuní cu e Colegio Ehecutivo y e Conseho Insular.

Un di e tópiconan principal den e reunionnan aki tabata fortificacion structural di Departamento di Finansa.

E Colegio Ehecutivo a indicá cu a opta pa un asercamento dòbel: Guia y entrená e empleadonan y simultáneamente percura p’e trabounan di tur dia.

Cft a bisa cu e ta bay di acuerdo cu e asercamento aki. Tin un necesidad grandi p’e fortificacion: Sint Eustatius ainda no ta capaz di haci su administracion financiero na tempo y cu suficiente calidad.

 

Ademas di e tópico di fortificacion di Departamento di Finansa, a papia tambe tocante di e proceso presupuestario y di responsabilisacion financiero di Sint Eustatius.

“Ainda no ta cumpli na tempo cu e obligacionnan di raportá”, asina e Presidente di Cft, Age Bakker a declará.

Entrega di e cuenta anual di 2015 y e reportahe di ehecucion di e delaster kwartal di 2016 ta cana atras.

E Presidente a enfatisá cu e reportahenan aki ta di importancia pa tanto Colegio Ehecutivo como pa Conseho Insular, pa nan por tin bon bista den e situacion financiero y asina haña e oportunidad pa por cumpli cabalmente cu nan tarea ehecutivo y di còntròl.

 

EHECUCION DI PRESUPUESTO

Còntròl di e cuenta anual di 2015 tin un retraso formal. Ta di spera cu aña 2015 lo sera cu e déficit di mas o ménos USD 0,6 mion, cual lo keda compensá den presupuesto di 2017. Considerando cu no a finalisá e còntròl ainda, ta bon posibel cu e resultado definitivo ainda lo por cambia.
Sint Eustatius ta spera un resultado positivo di mas o ménos USD 0,5 mion pa aña 2016, cu lo keda usá pa compensá e déficit anterior di aña 2014, cu ta mes halto cu e surplus.

Pa loke ta trata e presupuesto di 2017, Minister di BZK (Asunto Interior y Relacionnan den Reino), Ronald Plasterk, no a duna su aprobacion n’esaki na decèmber último.

Actualmente ta trahando na un presupuesto adaptá di 2017, den cua debidamente lo tene cuenta cu e recomendacionnan cu Cft a duna.

Ta di vital importancia pa caba finalisá e còntract cu NuStar mas liher posibel den un forma satisfactorio, ya por yega na un presupuesto 2017 cu ta balansá, y tambe cumpli cu pago di e administracion financiero.

 

 

 

 

 

 

 

 

 

 

Top