Agente policial Zeno Inecia liber di acusacion di ladronisia di pòrtofon

WILLEMSTAD – Diaranzon Huez a dicta sentencia den e caso caminda agente polisial Zeno Inecia tabata acusá di a hòrta un of mas pòrtofon.

Segun e sentencia dictá pa Huez mr. Mauritsz de Kort tin insuficiente prueba cu ta Zeno Inecia a hòrta un pòrtofon cu ta pertenecé sea na wijkteam Punda of Montaña.

 

Durante e periodo 3 pa 7 di febrüari 2016 e ladronisia aki lo mester a tuma lugar. Maske den e sentencia ta haci mencion cu e comportacion di e agente policial dor di presentá tanto na Warda di Polis na Punda como Montaña sea pa saca fotocopia y/of haci uzo di tualèt a sosodé di un forma straño cu ta lanta sospecho, pasobra e no tabata trahando n’e bürónan y no tabatin warda tampoco.

 

Segun e Huez e pruebanan tòg no t’asina convincente pa por bisa cu seguridad cu ta Zeno Inecia a cometé e ladronisia.

Un otro factor crucial ta cu a bin resultá cu e oranan registrá via cámara di video di e yegada y salida di Zeno Inecia no ta cuadra cu e orario real.

E cámeranan posicioná pafó di e Wardanan di Polis tin vários momento diferente registrá y asina ey ta difícil pa sa cua ora e sospechoso a yega y bay bèrdad for di e sitio.

 

Abogado mr. Anthony Eustatius ya durante e tratamento di e caso a mustra cu bastante conviccion cu tabatin mas colega Polis den e espacio, anto segun e abogado no a averiguá si ta un di e otronan por a hòrta e aparato.

Pues tin mucho buraco habrí den loke ta keda pretendé contra di Zino Inecia y no ta sigur cua momento por relacioná desaparicion di pòrtofon cu presencia of ausencia di e agente policial Zeno Inecia.

Con tal agente polisial Zeno Inecia a sali liber di e acusacion di a hòrta pòrtofon di Polis.

Top