Agricultor Willman Aristizabal na Prome Minister Eman: Aruba por yega ta autosuficiente den varios producto di alimento

Aruba ta produci 25% di e consumo local di Cilantro. Un berdura cu ta wordo uza den sopi y stoba por ehempel, pero tambe pa traha juicenan natural.

Un cunucu local caminda produccion di Cilantro ta tuma lugar ta na ‘Cunucu Pachamama’ di Willman Aristizabal situa na Soledad.

Un cunucu cu Prome Minister Mike Eman a bishita den fin di siman ultimo.

 

Sr. Willman Aristizabal, den un entrevista na su cunucu, a splica cu el a haci un esfuerso grandi pa yega asina leu, pero a demostra tambe cu na Aruba si por planta y produci “loke cu nos kier”. Nan ta haci uzo di un ‘Sistema Aeroponic’ pa cultivo n’e cunucu.

Eynan mes tambe ta produci e tera, creando compost di sobranan di restaurant y supermercadonan cu ta wordo converti den tera.

 

“Nos ta consumi masha poco awa (di WEB). Dor di e sistema cu nos ta uza, e awa no ta evapora asina facil.”

Ademas nan tin tanki di 10 mil galon cu a recoge awa di yobida, cu lo wanta te cu luna di mei/juni pa sigui muha e matanan.

E seccion unda cu e ta sembra su productonan ta tapa cu un net fini, cu ta yuda reduci e efecto solar cu 50%. Esaki ta yuda tambe cu e awa no ta evapora asina liher.

 

Cilantro ta un producto (organico) cu ta wordo produci hopi liher. Despues cu planta e simia, den 4 siman e ta cla pa corta y spacha pa supermercadonan, despues di a keda un par di ora den cooler.

“Den un supermercado ta facil pa detecta cua Cilantro ta produci localmente y cua a wordo importa. Esun local ta hole y ta mantene su holo, mientras cu esun di afo no tin holo mas.”

 

E ta haya cu Aruba por yega ta autosuficiente den varios producto di alimento.

“Den realidad, tur loke cu nos kier,” el a enfatisa. Ademas di Cilantro, nan ta entrega 5 mil lechuga mensual na supermercadonan rond di Aruba.

“Nos ta apoya hopi e studiantenan di SPO, ya cu nan ta e generacion nobo. Si nos logra lanta nan interes, cu nan ta namora di e trabou aki, nan lo t’e generacion nobo cu ta bay planta.”

 

Top