AHATA na mesa cu Minister di Salud Publico riba retonan cu sangura

Recientemente a tuma luga un reunion importante entre Minister di Salud Publico y Deporte, Dr. Alex Schwengle, Director di Departamento di Salud Publico Aruba Drs. Jerry Staring y Presidente di AHATA Jim Hepple, compaña pa Vanessa Rasmussen, ehecutivo di e asociacion di hotel y turismo di nos pais.

 

Tema di e reunion urgente aki tabata e situacion di sangura y Zika riba nos isla. Gobierno a suministra AHATA a ultimo cifranan confirma, a repasa e esfuersonan cu ta haciendo y a gradici e organisacion di hotel y turismo pa nan cooperacion y sosten den e esfuerso pa combati sangura y elimina criaderonan.

 

E casonan di personanan cu ta bay nan dokter di cas, ta presenta sintomanan di keintura, rash, dolor di cabes, cu por indica cu ta trata di un enfermedad transmiti pa sangura.

Den e caso akinan ta e enfermedadnan cu nan ta vigilando cu ta Dengue, Zika y Chikunguya.

E casonan registra y cu ta sospechoso ta mas den e areanan di San Nicolas, Savaneta, Santa Cruz y Pos Chikito. Y esakinan no ta casonan confirma pa laboratorio.

 

Tin mas hende muhe cu a notifica riba e enfermedad aki y DVG ta pensa cu esaki ta pa motibo cu e ser femenino ta yega dokter mas lihe cu hende homber. 65% di e casonan sospechoso ta entre personanan di edad 25 pa 64 aña. E sintomanan mas tanto cu DVG tin registra ta 1/3 parti di rash, 1/3 di keintura y mas tanto ta dolor di cabes.

 

AHATA a garantisa Gobierno cu nan miembronan ta haciendo tur lo posibel pa colabora cu esfuersonan pa conscientisa riba importancia pa hotelnan tin “0 criadero” y asina sigura cu nan empleadonan y nan huespednan ta hospeda den un hotel liber di sangura y di e enfermedadnan menciona. AHATA a compromete na ofrece Gobierno mas sosten den cualkier esfuerso pa hisa e nivel di conscientisacion den e temponan nos dilanti, hasta pa cuminsa prome cu e temporada di awasero mes.

Top