AHATA ta gradici señor Larry Darick Turista Mericano haciendo esfuerso pa tene Aruba limpi

AHATA a habri aña conscientisando un y tur riba eliminacion di saconan di plastic den nos bida diario. Tur esaki a bin despues cu aña pasa Parlamento a aproba e ley di saco di plastic. Un ley cu a keda implementa for di 1 di januari 2017. Pero no ta AHATA so!

 

E asociacion di industria turistico tin un di e mihor soldaatnan pa yuda hiba e mensahe importante aki n’e localnan como tambe na tur otro bishitante di nos isla.

Larry Darick di Pennsylvania, Merca tin 22 aña bishitando Aruba y for di prome biaha el a haci’e su mision pa haci e beachnan limpi.

AHATA ta desea gradici señor Larry Darick, pa tur esfuerzo cu e ta haci durante su vakantie riba nos isla pa nos costanan mustra bunita y pa conscientiza hende riba importancia di mantene Aruba limpi! Danki señor Darick di curazon!

 

“P’e 22 añanan cu mi ta bin Aruba mi ta lanta mainta tempran. Mi ta bay n’e beach entre 2 pa 4 ora, dependiendo con mi ta sinti ya cu mi tin 72 aña di edad y a haci 3 operacion di curason, pero ta den bon salud.

Durante mi keiro riba beach mi ta haci’e limpi, pasobra mi ta kere cu Dios ta bisando mi pa haci’e.

Mi a sobrebibi un accidente hopi pisa y mi a bisa mi mes cu mi kier haci algo positivo pa resto di mi bida y esaki ta loke mi ta haci. Te hasta bek na Merca, na mi cas mi ta haci limpi, haci limpi y haci mas limpi,” asina Larry a splica.

 

P’e bishitante aki e ta un lastima di mira un Aruba sushi, pasobra e ta un isla asina bunita… “pa chikito cu e ta, e ta simplemente un isla bunita. Haci’e mas bunita!”

Larry Darick ta bishita Aruba un biaha pa aña, tur aña pa entre 4 pa 5 siman den mesun temporada.

“Mi casa tabata yuda mi antes, pero su edad tambe a subi. E ta bin cu mi mas o menos 2 biaha pa siman. E ta piki e pida glasnan di lama. E ta bay cu e cosnan bon y laga esnan malo pa mi y ta parti nan cu e turistanan.”

 

Larry Darick ta gusta conta anecdota di su estadianan na Aruba y un di esnan cu tur ta corda ainda te awe y cu a bira un leyenda a pasa na 1997.

“E tabata mi di tres aña biniendo Aruba. Mi tabata kedando na Tamarijn y despues mi a muda pa Divi Village. Ora cu nos a yega e biento no tabata supla.

Tur hende tabata keha calor y cu no tabatin biento. Asina ta mi a bisa cu mi ta bay mira kico ta pasando.

Mi a bay e otro banda di e isla banda di e Lighthouse y e golf course. Eynan tabatin un muraya di mas o menos 4 pa 5 pia halto traha di staal y e tabata cubri cu saconan di plastic.

Mi tabata mira e biento supla bayendo riba cu tur e saconan di plastic, pero nada n’e otro banda di e isla.

Asina ta mi a haci’e completamente limpi y e hendenan a bisa mi despues cu mi a haci cu biento a supla atrobe na Aruba. Esey tabata un leyenda bieu!,” Larry ta bisa cu un sonrisa riba su cara.

 

E boluntario di haci beachnan limpi ta bisa cu mayoria di e sushi riba e beach aki ta di Trinidad & Tobago, Islanan Santa Maria, Venezuela… “y ocasionalmente mi ta haya piesanan straño.

E aña aki mi a haya dos bleki di Coca-Cola cu ta bisa ‘traha na Sur-Africa’. Mi no sa con nan a yega aki y ultimamente mi ta haya hemchinan chikito di plastic cu cosnan pega den nan, manera un helm duro y mi sa cu e por ta di un barco di Peking para p’afo.

E artefactonan aki ta cay for di e barco y esey pa mi ta hopi dañino p’e medio ambiente. Animalnan ta come nan y e ta haci nan daño”.

 

E ta sigui bisa cu tempo cu el a bin Aruba pa prome biaha e isla tabata basta sushi. “Mi a bay rond di e isla y tabatin sushedad tur caminda mas ainda despues di Carnaval.

E ta tuma entre un pa dos siman pa haci limpi riba beach y tur aña cu mi bin bek centro di ciudad ta limpi, e barionan ta limpi.

Mi sa di algun lugar riba e isla unda tin areanan di dump cu hopi no conoce. De bes encuando ta mira e dump cu nos ta yama “wild cat dump” unda tur hende ta tira tur cos,” asina Larry Darick a bisa un poco serio.

 

“Pero e isla a mehora asina hopi y ami kier mira e keda asina y bira mas limpi. E unico cu ami ta saca for di esaki ta cu mi ta spera si stop uzo di saconan di plastic awor mes entre 5 pa 10 aña e lo haci un diferencia grandi.

Esaki ta loke mi kier mira. Un fin na esaki, pasobra e ta pio cu ‘global warming.’ E ta mata animalnan”.

E amante di un isla limpi ta bisa cu porta e muchanan cu ta haya un educacion hopi bon na Aruba lo por carga esaki.

Arubianonan ta hendenan fantastico. Aruba ta p’e muchanan y nan yiunan y p’e futuro.

“Mi lo no t’akinan pa mir’e completamente limpi… pero mientras cu Dios duna mi forsa pa sigui bin Aruba, lo mi haci mi mihor esfuerso!”

 

Top