AHATA ta sigui conscientisa pa evita uzo di saco di plastic

Desde aña pasa juni e ley nobo pa elimina uzo di saconan di plastic riba Aruba a keda aproba den Parlamento, e ley nobo a drenta na vigor desde 1 di januari 2017. E asociacion di industria hotelero y turismo a traha un campaña di conscientisacion cu a cuminsa na momento cu Aruba henter tabata celebrando e yegada di un aña nobo como tambe un era nobo pa loke ta trata nos medio ambiente.

 

Cu tasnan re uzabel na man, e team di AHATA a subi caya bishitando diferente supermercado rond di e isla promoviendo uzo di e tasnan aki na luga di e sistema bieu unda nos matanan tabata keda tur na flornan di plastic. Siguiendo riba nan pasonan di conscientisacion a toca turno un bishita na aeropuerto unda AHATA a uni forsa cu Welcome Marketing Services N.V. pa trece conscientisacion di e uzo di tasnan re uzabel na e turistanan cu ta bishita nos isla.

 

Managing Director di Welcome Marketing Media, Maki Wiggins ta contento di por duna un aporte na e experiencia di e turistanan for di e momento cu nan pisa tera y ta splica cu pa basta aña caba su compania ta parti tasnan re uzabel yena cu flyers di informacion na e turistanan cu yega via nos aeropuerto… “uniendo forsa cu AHATA, uzando e tasnan bunita cu nan a laga traha specialmente pa e campaña di conscientisacion, ta un forma hopi positivo di bisa nos bishitantenan Bon Bini!”

 

“Nos compania ta parti tas re uzabel tur dia na aeropuerto. Den e tas por haya un guia di bishitante di nos cu informacion di tur tipo di actividadnan, restaurantnan, kico pa haci na Aruba, informacion di Aruba. Awe nos ta partiendo un tas special di AHATA mes pa introduci e ley nobo di “no one time use plastic bags” cu a wordo elimina na e isla pa uzo na supermercadonan y tiendanan,” Maki Wiggins ta splica. El a sigui bisa cu e tas special di AHATA ta pa crea conscientisacion riba e efectonan negativo di uzo di saconan di plastic. Hunto cu e tas a pone un flyer cu ta splica e turistanan un tiki di e campaña aki.

 

Segun Maki Wiggins, e campaña a cay den bon tera cerca e turistanan. “Nos ta premira cu ta bay parti hopi tas. Y nos ta purba parti un pa famia of pareha pa nan comparti e tasnan tambe y asina yega na mas hende posibel cu e campaña. Nos ta un compania priva pero semper nos ta colabora mas cu ta posibel cu asociacionnan manera AHATA pasobra nos ta wak nos mes tambe como e prome impresion cu e turistanan ta haya ora nan sali for di ‘baggage claim.’

Nos ta bisa nan Bon Bini cu un smile y un tas re uzabel di Aruba mes pa nan por uza durante nan estadia y nos ta tuma esey den consideracion hopi grandi na banda di e marketing cu nos ta haci pa nos clientenan”, e ta elabora.

 

“P’esey nos ta colabora pa por duna e miho impresion di Bon Bini cu por tin ora e turista yega na un destinacion,” e ta agrega.

E experto di mercadeo turistico ta sigui splica cu normalmente ora yega un destinacion no ta parti tas asina y esaki ta un bentaha cu ta duna un impresion unico na e turistanan cu yega aki. “Nos ta laga nan sinti confortabel y e informacion cu nos ta duna nan ta pa nan ta mas sigur riba e isla y pa nan por bay bek cas cu un bon experiencia di e tempo cu nan a keda cerca nos.”

Maki Wiggins ta informa cu aña pasa su compania a parti 215.000 tas cu ta un inversion hopi grandi. “A yega banda di 50% di ‘reach.’ Si bisa cu nos a duna un tas pa pareha of famia nos por yega mas cu 50% di e turistanan cu ta yega e isla.”

 

Sherwin Rasmijn, stagiaire di AHATA a keda encanta cu e impacto cu e campaña di conscientisacion di tasnan re uzabel na aeropuerto bisando cu no ta solamente habitantenan di Aruba mester sa di e ley nobo pero tambe e turista.

“Ora e turista yega nos ta duna nan un Bon Bini y parti e tas di AHATA. Hopi ta puntra kico e ta y eynan nos ta splica nan un tiki rib’e ley nobo cu a pasa riba uzo di saco di plastic desde 1 di januari. Nos ta partiendo nan como un regalo y tambe pa duna e mensahe di e campaña di AHATA. Nan ta keda hopi contento. Nan ta keda contento cu e regalo y bira mas consciente di e ley nobo”, e ta afirma.

Sherwin Rasmijn a termina bisando cu den un par di minuut el a parti mas cu 50 caba tas caba… “y tin hopi mas vuelonan cu mester drenta asina ta nos tin hopi mas pa parti.”

Top