Algun hoben a dicidi di core auto iresponsabelmente: Ta ora cu nan a bolter nan auto banda di Aruba Bank na Hato por a detene nan

 

Un caso cu a hala atencion y a pone un cantidad di Polis move riba caminda, ta ora cu un auto KIA Sportage, lo a pasa den luz cora, banda di Wendy’s na Noord, treciendo trafico den peliger.

Aki a cuminsa un persecucion formal y durante esaki tabata tumando lugar, e ocupantenan a cuminsa ta tira placa afo di e auto.

No solamente placa, pero varios otro artefactonan cu ta duna indicacion cu e ocupantenan aki, (5 den total) ta envolvi den un of otro caso ilegal.

Pa di pasa casi tur tur caminda na Noord, e chofer di e KIA Sportage, kende tabata core na un manera iresponsabel caminda, a bin bolter banda di e rotonde di Hato, na altura di Aruba Bank.

Polis a baha cu man duro riba nan y a saca nan for di den e auto.  Un total di cinco persona tabata den e auto aki. Por a tuma nota cu na caminda, nan tabata tira placa y celular for di bentana.

 

Mirando cu algun ora prome tabatin un asesinato na Jaburibari, Polis no ta descarta cu nan lo por ta envolvi, pero no a haya nada di arma di candela.

Ambulance tabata n’e sitio, ya dos di e ocupantenan a keda herida den e impacto. Nan tur ta stranhero, pero vocero policial Lito Lacle no kier bisa cu nan ta Venezolano. E investigacion ta sigui pa determina, e.o. unda nan a haya placa pa benta for di bentana, pero nan ta keda sospechoso tambe di caso di Jaburibari.

Ta trata aki di 3 hende homber y dos hende muher, aparentemente tur Venezolano.

 

Top