Alice van Romondt ta sostene y felicita AVP den su decision pa lansa Michael Lampe como candidato

Un di e defensor y promotornan mas grandi di arte y cultura en general na Aruba, sra. Alice van Romondt tabatin na su encargo diasabra anochi pa introduci Michael Lampe como candidato nobo di Partido di Pueblo Arubano AVP.

Esaki ta un encargo cu pa van Romondt tabata mas bien ta un honor y placer, conociendo e hoben musico y emprendedor creativo y den su introduccion el a elogia e cualidad y pasion di Lampe, mes tanto cu e vision y acierto di Mike Eman, como lider di partido.

 

“MinPres mi kier bisa bo ‘chapeau’; mi kier bisa bo pabien; mi kier bisa bo hopi pabien cu e escogencia di Michael Lampe pa subi lista di nos partido victorioso AVP”, van Romondt a bisa na un grupo grandi di famia y amigonan di Lampe hunto cu simpatisantenan di e partido berde cu a yena espacionan di Beam na Playa.

“Manera ta bisa na Hulandes: ‘Niet de eertste de beste’ sino un palanca; echt un palanca pa carga y sigui dilanti inovando, inspirando, rescatando, educando y compartiendo cu nos comunidad”, Alice van Romondt a bisa cu “esey ta Michael Lampe.”

 

Van Romondt a expresa di ta hopi contento pasobra awo cu tur trabou pa renoba, drecha, embeyece y haci Aruba mas sigur ta casi ful cla y casi tur plan a wordo ehecuta manera priminti y skirbi den programa di partido di AVP y den programa di gobernacion, awo cultura a yega su turno.

“Awo nos ta bay concentra riba locual ta haci nos na Aruba Arubianonan autentico; Arubianonan bieu y Arubianonan nobo. Awo nos ta bay concentra riba locual ta haci nos bon mira y hopi gusta y locual ta distingui nos di otro nacionnan, esey ta nos hendenan y nos cultura”, el a bisa.

 

P’e experto local den arte, no tin duda cu awo e industrianan creativo incluyendo artesano, musica y naturalesa ta na turno cu Michael Lampe como e guia principal.

“Teatro di bida ta siña nos cu no tin casualidad… Danki Minister Presidente, danki pa bo vision y danki pa e ‘perfect timing.”

Tambe el a elogia Lampe su orientacion pa inclui otronan manera su slogan di campaña ta bisa: “Ban cu Michael” na loke Van Romond a afirma cu emocion: “Nos tur ta bay cu bo y nos ta bay cu AVP.”

Leave a Reply

Top