Alto Comisario cu apelacion na tur Polis “Laga nos uni pa supera momentonan dificil den nos organisacion”

Despues di parada grandi di Carnaval di Oranjestad, Polisnan a bay duna asistencia na un cas. Despues di a detene un sospechoso, a bin keho cu Polisnan no a actua corecto durante e proceso di detencion, pa cual a start cu un investigacion interno, cu a conduci na detencion di 2 Polis y diahuebs mainta a detene 2 otro Polis den e mesun investigacion aki.

 

Alto Comisario di Cuerpo Policial Aruba, mr. Adolfo “Dolfi” Richardson ta lamenta e susedido, referiendo na ora mester detene Polisnan pa motibo di tabata eherciendo nan trabou.

Di otro banda, e hefe maximo di Polis ta corda tur hende cu nos ta biba den un pais democratico y di cual ningun persona ta para riba ley.

Ora un ciudadano entrega un keho, mester duna husticia e espacio pa investiga e caso pa por saca afor kico a sosode.
“Como Alto Comisario di Polis mi tin e deber di percura p’e coleganan cu ta sera awor y pa nan famia cu ta keda atras.

Mi ta comunica cu famia y cu coleganan directo di e Polisnan pa splica e procedura.

Pa awor mi tin cu laga e investigacion cana su caminda y mi ta spera cu si e Polisnan ta fout, nan lo tin cu haya castigo pa nan actonan, pero den caso cu nan no ta fout, pa por laganan liber mas pronto posibel”, asina Alto Comisario Dolfi Richardson a duna di conoce.
Comisario interino Eric Soemers, Hefe di Polis Uniforma, a splica cu di acuerdo procedura policial, ora un keho drenta, ta start mesora cu un investigacion, sea cu ta un Polis of un ciudadano, no ta haci distincion.

Manera den tur caso, liderazgo di un investigacion penal ta den man di Ministerio Publico. Den e caso aki, Fiscal a ordena pa detene tur 4 Polis sospecha di maltrato pisa di un ciudadano.

Alto Inspector Soemers a enfatisa cu Polis nunca a purba ni por influencia e decision di Fiscal di Ministerio Publico den nan investigacion.

“Mi kier ta hopi duidelijk, e hecho cu e 4 Polisnan ta sera aworaki no kiermen cu nan ta culpabel.

Den nos sistema di ley democratico, un hende ta keda inocente te ora demostra otro den Corte”.
“Pa mi tur colega ta igual. Na momento cu mi tin cu tuma decision, tur Polis ta mesun cos, nos no ta distingui rango”, asina Alto Comisario Richardson a aclaria.
E ta haci un apelacion na tur Polis, pa uni awor mas cu nunca.

Top