Alto Comisario di Polis, mr. Adolfo “Dolfi” Richardson: Polis ta forma parti di “Het Integraal Afpak Team Aruba”

 

Diabierna ultimo, durante e presentacion na gremio di Husticia y su diferente departamento, un di e topiconan cu mas a resalta pa aña 2017 tabata e introduccion di un team nobo pa ataca criminalidad na Aruba – “Het Integraal Afpak Team” – of simplemente “Afpak Team”.

E team aki lo drenta den accion oficialmente dia 1 di maart 2017.

 

E team lo bira oficial ora Minister di Husticia y Minister di Finansa firma pa por drenta den accion. E lo ta un cooperacion entre diferente instancia importante di Aruba, p’esey mes e nomber oficial “Het Integraal Afpak Team Aruba”. E team lo consisti di Cuerpo Policial (KPA), Departamento di Impuesto di Aruba (SIAD), RST di Hulanda, FIU (Financial Intelligent Unit) Cuerp di Aduana y Ministerio Publico.

 

Alto Comisario di Polis, mr. Adolfo “Dolfi” Richardson a duna di conoce cu e iniciativa di parti di Ministerio di Husticia pa bin cu e Afpak Team ta sosode a base di un bon cooperacion cu Hulanda. Ya caba nan a manda un experto pa yuda rib’e proyecto aki, p’asina, manera cu ya comenta, e criminal sintie den su cartera na momento cu e bay cera. Esey ta e castigo mas grandi. “For di e perspectiva di detencion mi ta kere cu e ta un bon strategia pa implementa”, asina e hefe di Polis di Aruba a enfatisa.

 

El a sigui bisa cu mas y mas ta ripara cu e hendenan cu no por duna cuenta pa e pertenencianan cu nan tin. Asina na momento cu investiga y proba cu e propiedadnan no a bin di un forma legal ta hacie un bon comienso pa bin cu un team specialisa asina.

“Tin cu bisa dor di e storia di exito na Corsou nos tin cu cuminsa cu ne hopi lihe. Nos tin un PG nobo basta agresivo y dentro di poco tempo el a logra pa nos bin cu e Afpak Team.

Ya caba nos a forma tur e teamnan manera boso a ripara y tur e departamentonan ta comprometi pa bin cu ne”, di acuerdo cu mr. Dolfi Richardson.

 

Meta di Afpak Team ta pa dirigi su mes riba criminalidad financiero den tur su formanan.

Asina ta traficantenan di droga cu keda gara ta trafica, p. e. cu placa den auto y ta core den auto bunita, lo kita esaki for di nan.

Den concepto di husticia, e individual ey no a haya su placa na un forma legal. E maneho nobo lo ta un clabo den wowo pa esun cu ta traha y gana placa na un forma indecente. Lo contesta rib’e necesidad aki tumando e toro na su cacho.

 

E por ta un traficante riba caya, pero e por tin consecuencianan grandi p’e. E por ta di e criminal mas chikito te na esunnan mas grandi manera un cu ta lanta un NV of cu lo kier laba placa.

Asina ta tin diferente forma. E team no ta mucho grandi, pues lo dirigi riba esunnan mas abao rib’e trapi di tipo di crimen asina. Casonan mas chikito. Despues di un aña lo evalua e efecto di e team cu e partnernan participante y nos lo evalua kico tabata e exitonan y kico tin pa siña ainda y unda mester inverti mas. A lanta e team aki na Corsou desde aña 2015 y cu hopi exito.

 

Pa loke ta e presentacion en general di e cifranan di criminalidad, e Hefe di Cuerpo Policial a bisa cu semper Polis ta apoya tipo di actividadnan asina pa por brinda mas oportunidad di informa comunidad riba kico ta haciendo, mas ainda mirando e desaroyo cu tin awendia riba tereno di criminalidad.

 

“P’esey mi ta kere cu tabata un bon momento pa nos intercambia di idea cu e gremionan y mi tin cu bisa e feedback cu nos a haya tabata hopi positivo y ta cosnan cu nos ta uza den nos maneho tambe”, asina Alto Comisario mr. Dolfi Richardson a termina bisando.

Top