Alto Inspektor Reggie Huggins, vocero y Hefe di Departamento di Comunicacion y Prevencion A duna version oficial di accidente di auto cu morto, detencion y confiscacion di arma, droga y municion

WILLEMSTAD – Ayera merdia, vocero y Hefe di Departamento di Comunicacion y Prevencion, Alto Inspector Reggie Huggins a duna e version oficial di loke a pasa den oranan di ayera madruga.

T’asina cu diabièrnè 18 augùstùs 2017 alrededor di 02.15 ‘or Guardacosta a notificá Central di Polis cu un boto lo a caba di haci un “dròp” na St Jorisbaai. Mesora Polis a bay den e direccion di St. Jorisbaai.

Ora cu Polis tabata yegando n’e sitio, nan a tuma nota di un Honda CRV preto cu tabata bin cu velocidad halti pafó.

 

A start un persecucion y durante e persecucion ocupantenan di e auto tabata tira cos fo’i di e auto. Polis a trata di para e auto aki, pero e chofer/sospechoso tabata core riba un velocidad hopi halto y na un manera iresponsabel.

N’e momento ey Polis a lòs tiro dirigí riba e vehículo aki. E vehículo (Honda) a sigui core y mas despues e persecucion a bin terminá ora cu e Honda a dal den muraya di un curá na Caminda Mitologia.

 

A resultá cu den e vehículo aki tabatin ocho (8) persona. E chofer y shete (7) otro ocupante.

Saldo di e choke ta: Dos (2) persona (un hòmber y un muher) a pèrdè nan bida n’e sitio mes dor di e dalmento di e auto. Identidad di e sospechoso/víctimanan ta conocí, pero mester keda identificá oficialmente ainda y mester pone famianan (den exterior) na altura.

Alrededor di 03.45 or dòkter di Polis a constatá morto di e dos personanan aki. Riba òrdo di Fiscal di Ministerio Público a confiscá e dos curpanan sin bida.

 

Ambulance a transportá seis (6) di e ocupantenan di e Honda pa Policlínica di SEHOS pa tratamento médico. Cinco (5) di nan pa heridanan cu ta varia di pia(nan) kibrá te dolórnan interno como consecuencia di e dalmento.

Un (1) di e 5 sospechoso/víktimanan aki ta den situashon hopi crítico. E di 6 víctima a ricibí un tiro den su garganta cu probablemente ta procedente di un arma reglamentario di Polis.

 

Dos (2) di e sospechoso/víctimanan ta naci na Sto. Domingo y ta biba na Còrsou. Cinco (5) di e sospechoso/víctimanan di nan ta naci na Venezuela. E sospechoso/víctima cu ta den condicion crítico no tin informacion di dje.

Durante un investigacion, Polis a haña y confiscá un cantidat di arma di candela, municion y droga den e saconan cu a keda benta fo’i di e Honda durante di e persecucion.

 

POLIS A HAÑA Y CONFISCÁ:

Ocho (8) pistol (5 Glock, por switch haci nan automático) Force 99, FN, Baretta Pietro, caliber 38.

Diesdos (12) revòlver diferente marca Ruger 38 special, Colt Cobra, Hogie, Smith and Wesson, Cold Agent, Amadeo Rossi. Mayoria 38 special, dos (2) di e armanan sin marca.

Ocho (8) cashi pa bala aparte diferente tipo cu bala skèrpi aden. Algun cu exstencion.

Diesnuebe (19) paki marihuana y cantidad di bala skèrpi.

Na momento cu identificá e dos personanan cu a fayecé durante di e accidente Polis lo haci nan identidad conocí.

Top