Alvin Koolman, Director di Refineria di Aruba N.V. Na ningun momento a para proyecto di rehabilitacion di refineria

“Na ningun momento CITGO Aruba a informa Gobierno cu e proyecto no ta sigui of cu e ta atrasa”, asina Alvin Koolman, Director di Refineria di Aruba N.V. a duna di conoce diabierna.

E reaccion a bin como un aclaracion pa un articulo cu ARGUS a publica.

Alvin Koolman a conclui cu e medio di comunicacion a uza e relato di prensa cu Banco Central di Aruba a emiti como su fuente p’e noticia aki.

Obviamente e relato di Banco Central ta contene informacion robes y e agencia a mal interpreta e informacion di Banco Central tambe.

Di otro banda, den e articulo ta cita un vocero di Ministerio di Energia di Venezuela unda ta bisa cu e proyecto no por sigui pa falta di financiamento.

Alvin Koolman ta lamenta cu e medio ta referi na “un vocero” pero no ta menciona nomber y como tal ta dificil pa deduci ken por a bisa algo asina.

Refineria di Aruba a garantisa cu CITGO Aruba ta siguiendo manera acorda.

 

Locual ta sosodiendo awor ta cu, e institutonan financiero ta rekeri un evaluacion completo, hopi detaya, di kico t’e inversionnan cu mester haci awor pa rehabilita e refineria pa por cuminsa opera. Ta papia di entre 600 pa 700 miyon dolar, cu aunke e “business case” ta bon, tog e industria financiero ta rekeri un evaluacion mas sigur.

Na februari ultimo CITGO Aruba a cuminsa tuma e prome 100 trahadornan, pa prepara e evaluacion aki. Ta premira cu fin di e luna aki lo ta cla cu e investigacion tecnico aki.

 

Pero, adelantando p’e financiamento final, banconan a otorga CITGO Aruba un asina yama “bridge loan” di 200 miyon dolar pa nan por cuminsa opera y prepara e evaluacion detaya aki, pa despues nan duna e resto di e fiansa.

Alvin Koolman ta lamenta cu Banco Central di Aruba mes no a suministra informacion corecto ora bisa cu na juli 2017 e proyecto lo cuminsa, pasobra esey no ta berdad.

E proyecto a start for di 2016 caba, pues no tin ningun sorto di tardansa di 8 luna.

“Bo no por firma dia 1 di october 2016 y cuminsa cu refurbish dia 2 di october”, asina Alvin Koolman a splica.

Ta despues cu bo firma ta cuminsa e periodo di inspeccion, pa despues cuminsa cu trabounan di refurbish cu lo dura 4 aña largo p’e refineria por cuminsa maneha 209 mil bari pa dia.

 

Por conclui cu Banco Central di Aruba no a compronde e asunto bon y a suministra informacion robes, pa cual e agencia internacional di noticia a mal interpreta e comunicado di prensa.

Kisas hopi hende ta corda ainda cu a anuncia cu na juli 2016 lo firma contract y a premira cu lo tuma entre 500 pa 600 hende na trabou den aña 2016 ainda y e rehabilitacion di e refineria lo a start den e prome kwartaal di 2017.

Pero no a logra firma na juli sino te na october 2016 pa cual e cantidad di trahador cu a premira den 2016 a resulta menos.

Pues, ta den e prome kwartaal di e aña aki a emplea mas trahador. Bisando esey, enbes di a cuminsa na maart ultimo, awor lo cuminsa cu trabounan di refurbish na luna di juli proximo.

 

Entretanto tin mas o menos 400 hende den servicio na CITGO Aruba y ta premira cu den e siguiente lunanan lo emplea un grupo mucho mas grandi di trahador.

Desde dia 1 di october 2016 Gobierno a funda Refineria di Aruba N.V. cu tin e concesion pa maneha e refineria, e terenonan y ta supervisa e huurdo, CITGO Aruba Refinery, den nan operacionnan diario.

Alvin Koolman, un experto den e industria petrolero, ta na cabes di e compania, cu ta doño tambe di Fuels Marketing & Supply Aruba cu ta maneha distribucion di gasolin, diesel y fuel oil pa nos pais.

Top