AMAK, CFC y IPFM ta aclarea algun punto

WILLEMSTAD – Directivanan di AMAK, Curaçao Festival Center y Instituto pa Formacion Musical, a tuma nota di algun publicacion cu no ta cuadra completamente cu e bèrdad.

Enbèrdad t’asina cu siman pasa autoridadnan di Impuesto a pone candal na porta di oficina den Curaçao Festival Center.

E ponemento di candal aki tabata aparentemente pa motibo cu Instituto pa Formacion Musical no a cumpli completamente cu pagonan fiscal.

 

Motibo di esaki ta cu e montante palabra pa subsidio pa Instituto pa Formacion Musical no a drenta ainda, y esey a pone cu e montantenan corespondiente no por a ser deposita na Ontvanger.

 

AMAK

Pa loke ta trata e organisacion di AMAK, ta bon pa mencioná cu tin un areglo entre e AMAK organisacion y Ontvanger pa mensualmente paga un suma riba impuestonan. Cu esaki AMAK a cumpli cabalmente te n’e momentonan aki.

Pa locual ta trata pagonan di OB, t’asina cu conforme un ley cu a sali na 2015, AMAK durante dos aña largo a entrega e peticion pa exoneracion di OB manera e ta prescirbí den e ley.

Te cu dia di awe AMAK no a ricibí ningun reaccion riba ningun di e dos cartanan cu a keda manda.

 

CURAÇAO FESTIVAL CENTER

E asunto cu Curaçao Festival Center tin 20 aña sin paga belasting, kisas ta referí aki na pago di Erftpacht Cannon di CFC.

Tin un documento firma, caminda for di inicio di CFC, den cua un Diputado ta sugerí pa laga e compleho cay bou di e institutonan cu ta paga un suma simbólico, como cu ta trata aki di un Centro cu aparte cu ta organisá Festival di Tumba aden, ta duna oportunidad pa centenáres di hóben cu ta bin di mayornan cu tin entradanan abou, ta ricibí instruccion musical grátis.

 

Ademas Curaçao Festival Center durante aña ta duna cooperacion na vários organisacion social, cu no tin e fondonan na nan alcanse pa cubri gastonan pa organisá nan actividad.

 

INSTITUTO PA FORMACION MUSICAL

IPFM  ta tratando pa solucioná e problema di financiamento structural p’e proyecto di formacion musical grátis pa hóbennan den bario.

Finalmente, AMAK ta pidi pa tur hende keda trankil, ya cu direktiva di AMAK y CFC durante último lunanan ta trahando intensivamente cu inversionistanan cu kier sea participá den Festival di Tumba o invertí den optimalisacion di e compleho.

 

Pa haci esaki ta necesario pa tin un ambiente trankil pa por finalisá tur e trámitenan y pa despues di reuní cu miembronan duna prensa e informacionnan conserní.

Leave a Reply

Top