Andin Bikker di Partido POR: Pueblo no por warda september yega pa trece seguridad riba nos isla

Partido POR, Plataforma Forsa Nobo, a yama su conferencia semanal di prensa diamars mainta. A hiba palabra Andin Bikker y Marisol Lopez Tromp.

Andin Bikker a habri e conferencia bisando cu pueblo no por warda september yega pa e. o. trece seguridad riba nos isla. Sr. Bikker a bisa esaki mirando tantisimo atraco cu a tuma luga den fin di siman, y tin hende cu a bis’e cu nan no a bay wak Carnaval, pasobra nan tin miedo cu nan haya nan cu atraco riba nan cas y confronta cu hende ta bin y bay cu nan cosnan.

 

“Nos a tene cuenta caba cu den Parlamento practicamente nos a tene varios bijeenkomst cu no ta yuda cu e control di Parlamento rib’e responsabilidad ministerial. Pakico mi ta bisa esaki?

Pasobra ora bo tin un bijeenkomst bo ta topa cu e Minister, bo tin tres minuut average pa hacie un par di pregunta, e ta contestabo y di eynan e ta bay”, sr. Bikker ta splica.

“No tin ningun manera pa bo eherce e instrumentonan cu bo tin como Parlamentario pa bo por, p. e. presenta un mocion of bo bin cu sugerencia pa dirigi e maneho of si tin ley bo por bin cu amienda”, segun sr. Bikker.

 

P’esey sr. Bikker a mustra cu pueblo no por warda te september yega, pasobra e ta unico manera cu nan por duna un señal pa vota contra e Gobierno akinan pa trece seguridad riba nos isla.

Na final di dia e Minister no ta saca su conclusion y si su fraccion ta keda sosten’e no obstante kico pasa y no ta duna pueblo proteccion, e ora eynan mes bo mester saca conclusion cu e unico manera ta “solo el pueblo salva al pueblo”, pasobra na september e pueblo por duna un señal cu no ta aproba e falta di maneho cu tin riba seguridad y riba husticia na nos isla, Andin Bikker a duna di conoce.

Top