Andin Bikker di POR: Mas Polis riba caya no ta e solucion mas pa seguridad, pero sistema di tecnologia!

Den conferencia di prensa di Partido POR, Plataforma Forsa Nobo, Andin Bikker a haya un pregunta tocante seguridad mirando cu mas di 200 Polis a desplega nan vigilancia durante carnaval na Playa y otro 200 na San Nicolas.

 

Sr. Bikker a contesta cu e Minister ta aplica e mesun sistema tradicional. El a comenta cu si traha sopi semper cu mesun ingredientenan e sopi semper ta bay smak mescos.

E no ta mira e solucion den ponemento di mas blauw riba caminda, sino na cambia pa un sistema moderno di seguridad, y a bolbe pone e ehempel di Hulanda, manera Rotterdam caminda nan ta hasta regala alarma di cas na e pueblo humilde cu nan por monitorea via internet mes.

Nan a cuminsa instala camara na diferente skina y duna estimulo fiscal na diferente empresario pa por mehora nan seguridad y asina tin mas cos cu a prueba cu nan ta traha.

 

Sr. Bikker ta kere cu si hopi hende di nos pueblo cu no tin manera pa yega na un alarma of paga monitoreo tur dia, si bo duna incentivonan pa cuminsa regala sistemanan di alarma cu aworaki via internet bo mes por monitorea kico ta pasando den bo cas y rond di dj’e, hopi hende cu tin alarma den su cas por sinti su mes un tiki mas sigur pa bay wak p. e. Carnaval.

Pero no por t’asina cu si e personanan ta bay wak Carnaval y ora bin cas ta confronta cu nan pertenencianan a bay perdi, of cu tin intento di atraco of atraco mes riba nan.

 

E caminda cu nos mester yega, segun sr. Bikker, ta bay no solamente na pone mas Polis riba caya, pasobra semper esey tin, aña aden aña afo ta haci e esfuersonan aki, sino mester bin cu otro alternativanan tambe pasobra obviamente e dimension aki no ta garantisando nos pueblo seguridad.

“Cu tur respet bo por tin hopi blauw riba caya, pero no por tur caminda tampoco. P’esey bo mester bin cu solucionnan alternativo, tecnologico pa cu esaki”, sr. Bikker a bolbe reitera.

Top