Andin Bikker di POR: Minister di Husticia no tin un plan pa combati abuso contra mucha

Andin Bikker, den rueda di prensa semanal di Partido POR, Plataforma Forza Nobo, a enfoca riba e hecho cu Minister di Husticia no tin un plan ainda pa combati abuso contra mucha.

Den cada reunion cu e mandatario tin den Parlamento, riba e tema di castigonan minimo, por ehemplo, ora di papia di introduccion di cambio di maneho pa loke ta concerni e castigo dor di Ministerio Publico ora cu tin cierto delito a wordo cometi, cada bez cu ta wordo pidi p’esaki wordo hisa e Minister ta cay den discusion academico, pakico no por, kico ta su preocupacionnan.

 

Parlamentario Andin Bikker a splica cu ora bo ta Minister di Husticia, en realidad dos codigo bo tin pa combati criminalidad.

“Bo tin e codigo penal caminda cu e castigo ta ancra den dje, pero bo tin e codigo di procedimento penal tambe” Andin Bikker a menciona.

E codigo di procedimento penal ta un instrument importante den combatimento di criminalidad.

 

“E Codigo di Procedimento Penal di aña 1996, practicamente no a wordo cambia. Na augustus cu a pasa hasta durante e instalacion di un Procurador General y tambe un Huez, a wordo señala cu e Codigo di Procedimento Penal for di 2013 caba nan a entrega un concepto y cu ta wardando p’esaki wordo adapta”, Bikker a splica.

El a papia tocante e adelantonan den nos Madre Patria Hulanda tocante e Codigo di Procedimento Penal por introduci, entre otro, e derecho di e victimanan.

 

Eynan hopi biaha e ta concentra riba e codigo actual, riba e derecho di esun cu ta wordo acusa. Pero con a para cu e victimanan?

Na Hulanda, por ehemplo, y na Merca tambe bo tin derecho ancra caminda cu e victima y su mayornan por hiba palabra durante un caso penal.

“Esaki ta incorpora den articulo 51 y otronan di e Codigo di Procedimento Penal di Hulanda. Bo tin tambe cu nan a amplia e casonan caminda e victimanan por cobra daño y perhuicio di esnan cu a haci nan daño” Andin Bikker a bisa.

 

El a trece dilanti cu esakinan ta ehemplonan palpable cu como Minister di Husticia ora bo carece di un vision pa combati criminalidad y bo tin e instrumentonan cu netamente, por ehemplo, cambionan den ley cu bo por moderniza nos leynan, anto bo ta gewoon ta keda drumi den luz berde, bo no ta actuando, no ta moviendo y cada bez cu den Parlamento y otro ocasionnan preguntanan ta wordo haci riba e tematica aki, bo ta keda busca excuse pakico algo no por wordo haci.

 

“Well, nos den nos opinion, mester por. Pasobra na final di dia e instrumento mas importante cu bo tin ta adapta y moderniza nos leynan, cuminza moderniza nos leynan” Bikker a menciona.

E ta haya cu pesey ta masha importante introduci un Academia di Ley caminda cu por educa e huristanan cu tin interes den esaki, cu sigur tin hopi, pa nan por haya e experticio pa por traha y moderniza nos leynan.

 

 

 

Leave a Reply

Top