Andin Bikker: Grupo lidera pa Alonso Tromp a tene un reunion ilegal E reunion no tin validez y no ta wordo acepta dor di PDR

Un grupo masha chiquito cu no ta ni representa 50% di miembro, y hasta ta papia di apenas cinco persona a purba hunto sr. Alonso Tromp den un reunion ilegal pa pretende cu nan lo a eligi un “directiva nobo” di Partido Democracia Real.

E reunion ey ta ilegal y pues no tin ningun validez. Ya for di comienso di siman a avisa e personanan aki via abogado cu nan no ta miembro y cu nan ta actuando di mala fe, segun mr. Andin Bikker.

 

Camara di Comercio tambe a wordo avisa cu e personanan aki no tin ningun tipo di autoridad. No obstante nan a core tene un reunion ilegal pa saca un comunicado cu nan lo a cambia bestuur di Partido Democracia Real, loke ta duna di conoce cu nan ta wordo dirigi pa forsanan aheno y opositor, cu e unico interes pa manipula informacion y crea un percepcion incorecto, segun Andin Bikker.

 

Ta remarcabele cu e grupo cu ta consisti di apenas 5 persona. Ta di spera cu Camara di Comercio lo actua diligente y no acepta e inscripcion di e reunion ilegal y e “reunion” pues lo keda sin ningun valides.

Lo tene tur e personanan aki, incluyendo sr. Alonso Tromp, personalmente responsible pa tur daño material, Andin Bikker a laga sa.

 

DIRECTIVA ELIGI

Por medio di un comunicado di prensa, e Partido Democracia Real (PDR) di Alonso Tromp a anuncia cu por medio di un asamblea (Algemene Leden Vergadering ALV), miembronan di PDR a eligi por medio di votacion e directiva nobo p’e siguiente dos aña.

Directiva nobo ta consisti di e siguiente miembronan: Manera ta di spera, Presidente: Sr. Alonso Tromp; Vice-Presidente: Sr. Angelo Roos; Secretaria: Sra. Lisette Gomes; Tesorero: Sr. Bernadino Stamper y 2do Tesorero:  Sr. Richard Goeloe.

 

Manera ya anuncia, nan lo bay prepara nan lista di candidato pa bay proximo eleccion. Y si e grupo di Andin Bikker kier bringa legalidad di esaki, nan ta cla pa bay Corte.

 

Top