Andin Bikker Minister Presidente tampoco ta haci su trabao pa cu seguridad; e ta invisible!

Andin Bikker di e Forza Nobo, POR a duna un par di ehemplo pa mustra cu no solamente e Minister no tin vision pa logra trece seguridad bek riba nos isla, pero Minister President cu tin e seguridad publico bao di su cartera y su responsabilidad, e no ta haciendo su trabao y ta gewoon completamente invisible.

Minister Presidente sr. Mike Eman, nos tin simannan largo cu nos no ta wake duna un press conference caminda e ta adresa e tematicanan cu ta preocupando y afectando nos pueblo.

 

E ta bon bay sende luz den bario, planta, corta yerbe den bario, bay come concomber cu cuchio cu forki, etc., e ta dedicando atencion na topiconan cu basicamente claro ta importante, pero no t’e cosnan prioritario cu ta afectando e pueblo.

Nos ta retando aworaki Minister Presidente Mike Eman pa bin dilanti asumi su responsabilidad, pasobra e tin desde juli 2014 cu el a bay welga di hamber, cu e ta coriendo pa su responsabilidad. Cualkier universidad di exterior ta invite bay duna un charla el a core bay, el a haci tur sorto di cos, menos adresa kico ta afectando nos pueblo” segun Andin Bikker.

 

Bikker a bisa cu pesey POR ta invite un rato p’e bin asumi su responsabilidad como mandatario, pasobra na final di dia seguridad di pueblo no solamente ta cay bao cartera di husticia, y ya ta wordo bisa caba cu Minister di Husticia ta fayando, pero e ta cay tambe bao responsabilidad general di Minister Presidente y por corda cu na 2009 e propio Minister Presidente a graba un video unda cu e ta sali f’e patras di un cas y bisa garantiza pueblo cu e ta bay restaura seguridad den pueblo, y awor bo por haya un oportunidad den gobernacion, pero den e caso aki a toca sr. Eman e suerte di haya dos oportunidad p’e por a trece bek seguridad den nos pueblo.

 

“Pero na final di dia kico nos ta constata? Lamentablemente cu e seguridad no a wordo restaura y mas aun cu den dos oportunidad di gobernacion bo no tin un bista na solucion di esaki”, Andin Bikker a bisa.

Ora cu pueblo bay urnanan electoral nan ta bay pa eherce nan derecho di voto, pa trece solucion pa problemanan cu ta afecta nan. Awor mi no por imagina mi mes Gobierno dos biaha caba ta faya den trece seguridad, algo asina primordial pa loke ta trata nos pueblo y aworaki sr. Mike Eman y sr. Arthur Dowers cu nan cara labada ta bay bisa pueblo dunami sosten atrobe, pasobra awor SI, pa di tres biaha nos ta haci mas esfuerzo pa nos trece seguridad bek na boso hogar”, Bikker a splica.

 

Na su opinion ora bo duna un persona dos oportunidad, nan ta bay haci e di tres fout e ora ey, pesey e ta bisa cu pueblo no por warda september yega pa trece bek seguridad den nan hogarnan, riba caya, na empresanan y riba nos comunidad en general.

 

Top