Andin Bikker: POR den Gobierno ta garantiza ley di flexibilizacion di pensioen AOV

Den rueda di prensa di POR,e Plataforma Forza Nobo,  Parlamentario Andin Bikker a bisa cu POR ta garantiza cu nan lo introduci e proyecto di ley di iniciativa cu el a presenta, na december 2014, riba flexibilidad di pensioen AOV.

Varios hende den nos comunidad no por warda pa nan baha cu pensioen na edad di 65 manera e ley nobo a aumenta edad di pensioen gradualmente.

 

Bikker ta haya cu tin hopi trahador den e sector hotelero cu t’e industria cu ta carga nos economia, cu ta haci nan trabao para, kiermen constantemente nan tin problema di pia y tambe den trabao di construccion cu ta hopi pisa, y asina tin mas sector cu ta rekeri di hopi esfuerzo fisico, y ora di bisa e trahadornan cu aworaki no ta 60 aña mas pa baha cu pensioen pero 61 y mey y asina gradualmente te 65, hopi di nan ta bisa cu nan no por yega n’e edad debi na nan salud.

Segun Bikker diferente persona a pone den nan contratonan di trabao cu nan ta bay baha cu pensioen na nan 60 aña y cu no por a premira e tempo ey cu nan edad di pensioen lo subi te 65.

 

“Esey ta haci awor cu nan ta keda un of dos aña cu nan no tin entrada, y pesey introduciendo e concepto di flexibilidad di pensioen cu e persona por scoge pa baha cu 60 aña, pero nada mas ta haya un korting chikito” segun Bikker.

Di otro banda tin e opcion pa sigui traha na banda p.e partime, pero nan tin un entrada y mas flexibilidad riba ki ora nan baha cu pensioen, y den ki dimension.

Asina ta tene cuenta cu e aspecto colectivo, pero tambe cu e persona como individual. Tambe POR lo bin cu un clausula pa proteha e fondo.

 

Bikker a splica cu si 5 mil persona anualmente lo por haci uso di e opcion pa bay mas tempran cu pensioen, lo bin cu un keuring medico pa keda na 5 mil y esnan cu bin acerca ta keda p’e aña cu ta sigui.

Bikker a splica cu na Hulanda tur partido cu a bay dilanti den voto, a bay eleccion cu un concepto di flexibiliza pensioen ya cu na Hulanda nan a bay na 67 aña y mey , y nan a acople na expectativa di bida, pasobra ayanan e edad ta keda subi y por sigui subi gradualmente, sin cu mester bin Parlamento.

 

Nan ta keda confronta cu e problema cu hopi persona cu ta traha den sectornan vulnerable cu nan trabao ta rekeri di hopi esfuerzo fisico, ta reclama cu nan ta yega 80 aña ainda den flor di nan bida sin por haci uso di nan pensioen”, Bikker a bisa.

Tempo cu el a propone e flexibilizacion aki, Andin Bikker a debati cu Minister Presidente Mike Eman riba esaki, y rotundamente e no a bay di acuerdo cune.

El a bisa cu bo mester cay den un network di famia y amigonan.

 

Bikker ta haya cu sr. Mike Eman ta un tiki distancia di e realidad di Aruba, pasobra na final di dia hopi hende tin dificultad y bon por ta cu nan no por funciona mas na nan 60 aña y tin entre 2 pa 5 aña mas pa bay manera ta stipula den e ley di pensioen nobo, cu e Prome Minister ta kere cu mester wordo sostene dor di famianan.

Esaki no ta husto p’e persona ni esnan rond di dje, Andin a bisa.  Mester duna e derecho individual n’e persona pa scoge ki edad e kier baha cu pensioen, cu ta algo di dje, pasobra el a traha tur e añanan ey pa yuda crece nos economia, y no ta husto cu e no por haci su decision individual”, Andin Bikker a splica.

 

 

 

 

Top