Andin Bikker (POR): Gobierno actual no sa con pa para e ola di criminalidad Situacion ta for di control cu atraco cada rato te den hogarnan

Parlamentario Andin Bikker (POR) ta constata cu mientras Prome Minister Mike Eman ta purba desvia atencion dor di jog cu sapato cu jeans y colga na truck di recoge sushi, nos pueblo ta bira victima di atraco, maltrato y tur tipo di crimen te den nan propio cas.

Durante eleccion na 2009 e propio Promer Minister Eman a traha un propaganda caminda e ta sali for di patras di un cura priminti cu e den Gobierno lo sa di contra-aresta e ola di criminalidad di e tempo ey.

 

Awor bayendo pa casi 8 aňa den gobernacion di Gabinete Mike Eman nos por conclui cu e Gobierno actual no sa con pa para e ola di criminalidad.

Al contrario e ola di criminalidad a aumenta barbarmente te cu a drenta den hogarnan di nos ciudadanonan y hasta afecta turistanan, caminda cu turismo t’e unico pilar economico cu nos a resta.

Andin Bikker: “Mi persona for di Parlamento y den prensa a bin ta mustra riba e falta di vision y maneho riba e tereno di Husticia desde aňa 2010 bin riba y mi a presenta varios posibel solucion, manera e.o. e ley di defensa propio y Burgernet (“Crime Alert”), a trece profesor dr. Peter Tarlow experto y cu a scirbi buki riba seguridad for di exterior pa yuda pensa riba solucion, a start un campaňa pa alarma pa auto y cas, pero e Minister encarga cu Husticia nunca a haci mucho caso.

Cu 8 aňa den gobernacion Ministernan Eman y Dowers a gradua pa un diploma cu nan no sa con pa maneha e tema di combati criminalidad”.

 

Pues cu e Gobierno actual no por spera un cambio pa cu e seguridad di nos pueblo ya cu dos periodo di gobernacion caba a resulta cu e Gobierno actual no tin solucion ni vision pa cu esaki. Cu e plataforma di union Forsa Nobo/POR den Gobierno esaki lo conoce un cambio real pa miho, lo combati criminalidad cu man duro cu un maneho efectivo, pragmatico y concreto y duna pueblo bek trankilidad den hogarnan, na trabou y tur otro caminda riba nos isla, segun Andin Bikker.

 

Top