Andin Bikker: POR lo introduci sistema di crowdfunding pa yuda e.o., nos agricultornan

Andin Bikker a duna di conoce den rueda di prensa, cu siman pasa el a reuni cu diferente instancia, y el a bin constata cu diferente persona na Aruba y den tur ramo di economia, cu tin bon idea.

Bikker a bisa cu na Aruba tin hopi talento y cu si nos bay cualkier otro pais rond mundo, den cualkier municipio di 10 mil hende, y compare cu Aruba nos por wak cuanto talento nos tin, e ta increible.

 

Nos tin campeonnan mundial di surf, nos tin hende na NASA, y rond di mundo nos tin hendenan respeta pa nan talento. POR a constata cu tin diferente di e personanan talentoso aki cu kier lanta nan propio empresa na Aruba.

Siman pasa cu Andin Bikker a bishita Santa Rosa, el a mira cu tin hopi persona cu ta ambiciona nan empresa agricola, pero loke ta pasa ta cu nan no tin e fondonan necesario, pasobra e formanan normal pa financia empresanan cu mester tin garantia cu bo haya un fianza, hopi biaha no ta funciona pa empresanan cu mester cuminza netamente ora no tin capital.

Bikker ta mira e solucion p’esaki den un trend cu nan ta yama crowd funding cu ta nifica cu tur hende ta duna un contribucion chikito y ta reuni un capital grandi.

 

No mester mucho tampoco pasobra hopi empresa no ta rekeri di mucho placa, pero nan mester si, si nan no tin fondonan pa pone como garantia.

Andin Bikker a splica cu su persona a bin cu un amienda na november ultimo, ora cu a introduci e ley pa supervision di effectenverkeer dus ora bo tin instrumentonan monetario cu awor porfin a base di amienda 75 bo por bin cu e reglamentacion pa introduci un mercado asina, mescos cu na Hulanda y na Merca, cu netamente caminda cu personanan tin bon idea, pero cu no tin capital ainda pa logra nan ideanan e ora bo por duna nan aceso cu personanan por contribui un tiki cu donacion of nan por aproba pre-order un producto cu ta bay wordo produci, den e caso aki nos agricultornan pa mas producto local por wordo genera na Aruba.

 

Asina nos por yuda e empresanan aki y pasa over di e obstaculo inicial cu empresarionan cu tin hopi gana, e conocemento y talent, pero no tin aceso na mercado di capital.

Cu esaki Andin Bikker ta haci un apelacion na Minister di Finanza, pasobra ora cu el a presenta e amienda na november, durante e tratamento di e ley aki, el a haci un apelacion na Andin bise pa wanta un rato cu e amienda y cu e ta bay reglamenta esaki, pa medio di un decreto.

Bikker a bisa cu e ta wardando riba e decreto ey y cu e ta spera cu e ta duna nos empresario y nos agricultornan aceso na crowd funding.

 

Tin banconan local cu aña pasa caba a avisa di iniciativanan cu nan ta interesa pa introduci plataformanan asina aki, y cu riba internet tin varios caba. Andin Bikker ta kere cu Aruba no por keda atras den tecnologia y esaki ta subraya atrobe cu POR ta bin cu dimensionnan nobo y nan ta kere cu Aruba merece di conceptonan nobo.

El a bisa cu hopi partido di diferente signature a yega di purba introduci e diversificacion di nos economia sinembargo hopi no a logra.

POR, constatando cu e generacion nobo ta buscando retonan nobo, nan no ta djis menciona esaki, pero ta bin cu cosnan concreto. El a anuncia cu pa fin di april POR ta treciendo Aruba un grupo di persona cu experticio di New York y otro partinan rond mundo, cu entre otro durante un siman ta bay tin diferente encuentro na Universidad di Aruba y otro entidadnan local unda nan ta bay presenta conceptonan, por ehemplo con ta lanta un compania riba internet, crowd funding den un fase inicial, y asina aki diferente otro tema unda ta bay duna contenido n’e filosofia cu POR ta bay introduci un pilar economico nobo cu ta e economia di internet y den e dimension aki yuda nos agricultornan pa nan crece nan empresanan cu hopi biaha e aceso n’e capital.

Top