Andin Bikker (POR): Mientras cu Prome Minister ta keto, e ola di criminalidad ta keda asota nos isla

Den fin di siman e ola di criminalidad a keda asota nos pais. E biaha aki por a tuma nota cu awor ta den pakeerplaats di un banco un atraco a tuma lugar den pleno dia cla, ora cu un empresa a bay deposita placa.

No mucho tempo pasa un caso similar a tuma lugar ora cu un persona di edad a bay deposita placa na un otro banco y el a wordo atraca.

Comienso di siman pasa tambe a tuma nota den prensa cu un persona a wordo atraca na un bancomantico.

Asina por sigui menciona varios caso di atraco y inseguridad cu a bin ta tuma lugar riba caya, den hogar y na empresanan, anto den pleno dia cla. Na palabra, Andin Bikker, di partido POR.

 

Mientrastanto di e actual Minister encarga cu Husticia no por spera mucho paso ta bisto cu despues di casi 8 aňa cu e puesto e no tin capacidad ni vision pa bin cu un maneho efectivo pa preveni y frena e ola di criminalidad.

E Minister ta bon purba desvia atencion atacando oposicion, ta sconde tras di cifra di otro paisnan y busca tur sorto di escusa pa purba hustifica e hecho cu e ta fayando barbaramente den su maneho.

 

Ta con por ta posibel cu un Minister di Husicia ta papia di tene cuenta cu “high season” den criminalidad, caminda cu e ta den gobernacion y ta responsabel pa prevencion y combatimento di criminalidad?

Y no obstante promesanan di campaňa desde 2009 di parti di e actual Prome Minister pa cu seguridad di nos ciudadanonan, ta bisto cu sr. Mike Eman ta hopi keto y practicamente no ta duna cara, caminda cu e ta politicamente co-responsabel pa cu e tema, mr. Andin Bikker a sigui declara.

 

A bira un mal custumber di e Prome Minister desde 2014 cu e ta huy cada bes pa exterior coriendo pa problemanan den su gobernacion keriendo cu e problemanan ta bay resolve nan mes den su ausencia.

En todo caso por conclui cu sres. Mike Eman y Arthur Dowers no por a garantisa seguridad riba nos isla despues di 2 oportunidad den gobernacion.

Pues pueblo ta fada y harta di e falta di seguridad riba nos isla cu a bin ta reinando durante Gabinete Mike Eman I y II, y ta demandando un solucion.

 

En todo caso e Plataforma Forsa Nobo/POR den gobernacion nos ciudadanonan por ta sigur cu nos lo recupera y trece seguridad y tranquilidad bek tur caminda riba nos isla, mr. Andin Bikker a garantiza.

 

 

 

 

 

Top