Andin Bikker ta haya cu pa ley e agresor mester paga dañonan causa na su victima!

Tocante e tema di falta di maneho pa loke ta trata abuso di mucha, di parti di Minister di Husticia, Andin Bikker di Partido POR a sigui elabora den rueda di prensa di diamars.

El a bisa cu ta un ehemplo palpable cu lamentablemente nos ta confronta, cu hopi caso di abuso di menor, entre tanto por wak cu e Minister actual ni den totalidad pa combatimento di criminalidad ni riba e problema specifico aki tin un plan di maneho.

 

Bikker a menciona cu na final di dia si bo pensa un rato riba introduccion di castigo minimo, unda bo ta duna un señal fuerte como legislador, bo por bisa “tende aki, e actonan aki ta inaceptable, repudiable, y nos comunidad no ta acepte.

Na di dos lugar e maneho pa loke ta trata castigonan cu ta wordo pidi ora cu actonan asina ta wordo tuma, di parti di Ministerio Publico.

E maneho eynan tambe bo por adapte, cu bo ta bisa cu den casonan asina mester bin castigonan minimo halto cu ta wordo pidi anto laga Corte dicidi si ta baha e castigo si of no!” Bikker a splica.

 

Pero como Ministerio Publico, Andin Bikker ta bisa, e maneho mester ta duna un señal ora bo pidi castigo bo ta pidi un castigo halto.

Na di tres, bo ta introduci e derecho di e victima, su pariente, su mayornan, pa bo por hiba palabra den caso penal. E di 4, ta cu e daño cu e malhechor ta comete, e mester sinti’e den su cartera tambe, pasobra e persona cu el a herida emocionalmente pa añanan y nan mayornan mester paga psiquiatra, etc.

Y no ta husto cu mayornan cu no a haci nada malo, hopi biaha e malhechor t’esun cu mester paga e gastonan, Andin Bikker a bisa y a trece dilanti tambe cu no ta algo cu e ta inventa, pasobra na Madre Patria Hulanda y na Merca nan ta trahando riba instrumentonan cu ta funcionando asina aki.

 

“Ta lamentable cu bo tin un Minister di Husticia cu riba e tematica aki ta morto na soño anto nos pueblo ta sclamando pa seguridad riba nos isla y esaki nos como partido nos filosofia semper no ta djies señala un problema, mi ta bin semper cu posible solucionnan.

Y mi a caba di menciona 4 solucion palpable pa un di e problematicanan cu ta afecta nos sociedad”.

Bikker a bolbe bisa cu e problematica mas grandi ta cu Minister di Husticia no ta haciendo uso di su instrumentonan cu e tin pasobra na final di dia un Minister di Husticia ta responsable pa tur e leynan di nos pais, traha ley tambe y conceptonan di ley.

 

 

Top