Anochi di informacion di Stichting Epilepsie Aruba: Dr. Carla di Caudo cu charla riba epilepsia na Aruba

Diamars awor dia 13 di februari 2017, precisamente riba Dia Internacional di Epilepsia, Stichting Epilepsie Aruba ta organisa un anochi di informacion atrobe. Lo bira un evento hopi interesante cu charlanan di 2 Neurologo di Aruba y testimonio di un pashent di epilepsia pa hopi aña.

E anochi aki lo tin un caracter special cu apertura door Dr. Alex Schwengle, Minister di Salud Publico, Cuido di nos Grandinan y Deporte.

 

Dr. Carla Di Caudo lo elabora riba un estudio cu e ta haciendo rib’e situacion di epilepsia na Aruba, algo te ainda desconoci na nos pais mientras Dr. Rafael Gonzalez Redondo lo trata e relacion di epilepsia y stroke.

 

Manera conoci, a funda Stichting Epilepsie Aruba na 2007 cu e meta pa brinda informacion di epilepsia na comunidad. Esaki pasobra tabata y te ainda tin un necesidad grandi di informacion rib’e enfermedad aki: Kico ta epilepsia, con pa anda cu ne, un hende cu tin e problema aki por hiba un bida normal? Cu ayudo di e. o. dokter y otro personanan activo riba epilepsia, e fundacion riba un base regular ta tene anochi di informacion cu charlanan rib’e enfermedad aki.

 

Prome cu a lanta e fundacion, pashentnan di epilepsia practicamente no tabatin aceso na informacion riba e enfermedad, cu tur su consecuencianan.

Durante casi 10 aña, SEA regularmente a tene eventonan manera esun di otro siman y ta duna tambe charlanan na hopi instancia na Aruba p. e. na scol y crèchenan, YMCA, centronan di bario, Casa Cuna y otronan. Esakinan ta wordo duna dor di 2 verpleegkundigen di SEA.

Pa mas informacion por yama Margarita Pourier-Henricus na tel. 600-4184.

 

E anochi di informacion e biaha aki lo tuma luga na Auditorium di Universidad di Aruba diamars 13 di februari 2017 di 7:00pm pa 9:30pm. Idioma lo ta Ingles y Papiamento y entrada ta gratis. Tur hende ta bon bini!

Top