Anuncio di partido MAS (Movimiento Arubano Soberano)

Conciudadanonan, awe nos ta haci formalisacion di partido Movimiento Arubano Soberano via Electorale Raad den presencia di sr. Hubert Maduro.

Partido Movimiento Arubano Soberano a wordo funda por medio di acto notarial na september 17, 2015. Nos partido ta un partido registra caba na Kamer van Koophandel, pero tambe na Electorale Raad for di comienso di aña y aña pasa respectivamente.

Awe ta solamente e formalidad di e registro ta wordo hasi publicamente cu e presencia di sr. Hubert Maduro di Electorale Raad.

 

Na momento cu nos a pidi pa registra e partido na Electorale Raad nos a menciona tambe kico e colornan di nos partido ta bay ta como su branding of marca.

Esaki no a bai sin consulta cu sr. Hubert Maduro mirando cu UPP tambe tin color blauw.

Dor cu UPP su color blauw ta distinguiblemente diferente y mucho mas cla, no lo forma un problema di bruhamento of verwarring, pasobra e color principal di Movimiento Arubano Soberano ta un blauw scur y e color secundarionan ta cora cu blanco.

E colornan aki ta e colornan di e partido su marca of su kenmerk, y no necesariamente e color cu lo bin rib’e stembiljet, pasobra esey lo wordo determina otro aña dor di Electorale Raad.

 

For di januari caba nos tabata profila publicamente cu nos colornan tanto riba nos Facebook wall di e partido, pero tambe nos a print stickers cu algun autonan ta coriendo cu nan caba. Adicionalmente, nos tabatin koffie morgen dia 31 di juli, 2016, na Club Don Bosco na Noord unda nos color di partido a wordo ilustra tambe. E comprobante di esey ta riba nos ticketnan cu a wordo bende. Mas ainda, tin hopi hende a like, share y commenta riba nos pagina of nos logo di cual ta publicamente conoci como nos color of kenmerk.

 

Tur esakinan a pasa prome cu Otmar Oduber a scoge su color y nomber di partido, unda e mes a declara na prensa, den su reuda di prensa, cu ainda e color y nomber di su partido mester di wordo determina.

Dus basa riba merkrecht nos di Movimiento Arubano Soberano tin e derecho riba e colornan blauw scur, cora y blanco como nos kenmerk di un partido politico na Aruba.

Esaki tambe ta ilustra cu Otmar su modus operandus no ta diferencia di e partido den Gobierno, paso nan tambe ta trapa riba derecho di otro.

E Gobierno aki no ta diferente paso nan ta duna vergunning na companianan sin cu pasa e proceduranan legal prome. Eseynan ta fechorianan cu nos partido MAS lo bay pone un final na dj’e. Pues e Forsa Nobo no ta nada nobo di locual ta exisiti den Gobierno y Parlamento caba. Nan ta keda cu e mesun mala maña. Un tiger no ta perde su strepinan.

 

Pa un partido por demostra cu nan lo ta e solucion pa e pueblo y por cumpli cu e pueblo cu promesanan haci na pueblo, e partido mester di ta bon planifica, structura y organisa.

Nos a tuma nos debido tempo pa planifica, structura y organisa e partido p’asina nos por garantisa e pueblo di Aruba cu nos ta e alternativa sincero cu e solucion berdadero.

Movimiento Arubano Soberano no ta un partido cu a lanta di awe pa manjan sin e debido preparacion.

MAS no ta manera otro partidonan cu a core lanta den pura y ora cu nan a realisa cu nan no por forma un lista riba nan mes, nan a core join cu otro pa purba forma un lista.

Esey no solamente ta ilustra fuertemente e falta di preparacion debido pero tambe ta ilustra un debilidad enorme, unda e lidernan por bende nan alma cu diablo basta nan yega na poder.

Anto e interes di pueblo mes ta keda un banda un biaha mas e ora si nan logra yega na poder.

 

Pues e joinmento di e partidonan PDR y POR ta confirma nan union di conveniencia y ta ilustra tambe e falta di caracter, principio y moral di e lidernan di e partidonan en question.

Uno a bay te hasta asina leu di elimina su mesun partido p’asina forma cu un otro, di kende e mes tabata opone den Parlamento. Asina tin hende ta bende nan alma cu diablo basta nan yega na poder. Mi persona no ta drenta politica pa haya poder of enrikece mi mes.

Politica ta pa sirbi e pueblo y no pa e pueblo sirbi e politica, manera cu e situcaion ta for di 1986. E no ta asina cu e pueblo tin cu depende riba cua Minister of politico e conoce pa haya un oportunidad pa trabou of cualkier otro proyecto. No tin opportunidad igual na e pais aki.

Tur e tipo di politicanan aki a contribui na haci nos pueblo dependiente di e Gobierno cu sinta. P’esey nos pueblo mester ta consciente cu ta e pueblo tin e soberania riba cualkier Gobierno cu sinta. Pueblo ta independiente di cualkier Gobierno, pasobra ta pueblo tin e poder den su man. Pesey nos di partido MAS lo percura cu nos pueblo recupera e poder soberano aki bek den su man.

 

E Gobierno aki a percura pa nos costo di bida a subi y e calidad di bida a baha. Nan no tin e vision ni e abilidad pa por fortalece nos economia p’asina percura cu futuro di nos yiunan ta protehi y mas sigur.

E unico cu e Gobierno aki a logra ta pa pone nos pueblo dependiente di nan p’asina nan por dicta riba bo futuro y determina bo futuro pabo.

Awendia e derecho di expresa no ta bay sin menasa y intimidacion. Pues awe nos di partido Movimiento Arubano Soberano ta bay pone un final na tur e fechorianan aki cometi dor di tur e partidonan y e politiconan cu a goberna y cu a forma parti di Parlamento tambe.

Partido Movimiento Arubano Soberano ta kibra barera y ta crea future.

Top