Apertura di e di cinco exposicion di arte na KvK lo ta diabierna awor

 

Pa 5 aña caba Camara di Comercio y Industria di Aruba (KvK) ta brinda su aporte na nos artistanan local pa medio di ofrece su murayanan pa asina nan por expone nan obranan di arte.

Diabierna, 3 di november proximo, KvK lo tene e apertura oficial di su di cinco exposicion di arte.
E obranan cu pa un aña largo tabata embeyese e sala di recepcion di KvK, ta di e artista sra. Elizabeth Puente-Badell cu ta hiba e titulo “Serendipia”.

Su exposicion lo keda remplasa cu un exposicion di artistanan nobo.

 

P’e edicion aki, KvK tin e honor pa prome biaha di expone arte di varios artista hunto.

E biaha aki e artistanan t’e studiantenan di Stichting Mira, cu ta consisti di hobennan cu a cuminsa pinta na un edad hopi hoben.

Durante e anochi di apertura e artistanan aki tambe lo ta presente pa asina publico por combersa cu nan y duna nan e oportunidad di splica nan expresionnan artistico.

Nan lo ta acompaña pa nan mayornan y e Directora di Stichting Mira, sra. Jean Vieira, cu ta un docente di arte di profesion ya pa hopi aña y tin hopi experiencia den e area di arte creativo y terapeutico pa tur edad.

 

E biaha aki mayoria di e obranan lo no ta benta pero tin e opcion si pa haci un donacion n’e fundacion. Stichting Mira ta un fundacion p’e educacion artistico y e aprecio di arte.

E fundacion a wordo estableci dor di sra. Jean Vieira riba 6 di october 2006, y ta duna les n’e muchanan di Aruba for di aña 2007.

Muchanan por cuminsa sigui les ya caba cu un edad di 4 aña. Tambe tin les pa adulto y hende di edad mas avansa.

Tur studiante ta ricibi guia enfoca riba diferente proyectonan di arte.

 

E apertura oficial ta tuma luga diabierna, 3 di november di 5:00 PM pa 7:00 PM na KvK. Entrada ta gratis y ta inclui bebida y algun pasaboca. Pa confirma bo presencia por bay na www.arubachamber.com/signup y escohe e evento “Aruba Chamber Art Exhibition 2017”.

 

KvK ta gradici sra. Vieira y Stichting Mira pa acepta e invitacion y exhibi nan obra di arte den nos edificio y ta invita un y tur pa pasa libremente durante orario di oficina, di dialuna pa diabierna, entre 8:00 AM y 4:30 PM pa admira e diferente obranan di e studiantenan artista di Stichting Mira. Alabes KvK ta invita un y tur pa bishita e apertura di e exposicion. Esnan interesa pa haya mas informacion tocante e posibilidad pa expone nan obra na KvK por manda un e-mail pa: businessinfo@arubachamber.com of yama na 582-1566 ext. 30.

Leave a Reply

Top