Apertura oficial di Campaña di MEP y Celebracion di Himno y Bandera dia 17 y 18 di maart

 

E fin di siman aki MEP hunto cu pueblo lo bay tin dos dia sumamente festivo na su Sede na Santa Cruz. Manera ta custumber caba, MEP como e partido cu na 1976 a percura pa Aruba haya su simbolonan di union y libertad, esta nos himno y bandera, lo tene varios actividad p’asina conmemora nos dia nacional y duna reconocemento na baluartenan fiel di nos partido y pais y alavez habri oficialmente su campaña 2017.

 

Diabierna 17 di maart

Riba diabierna caba, 17 di maart desde 6’or di atardi te cu 12’or di anochi lo bay tin varios actividad na Sede, manera e. o. reconocemento na un gran cantidad di baluarte y lidernan di bario cu durante hopi aña a lucha fielmente hunto cu nan partido MEP. Lo bay tin entretenimento di Mini Tsunami, Apertura oficial di Campaña 2017 di MEP y tambe lo tuma lugar e sorteo di rifa di auto Hyundai EON 2017.

Pa banda di 11’or di anochi lo tin e acostumabrado caminata cu e bandera di mas grandi di Aruba, saliendo for di Plaza Status Aparte Betico Croes acompaña pa All Star Brassband direccion Sede di MEP, caminda lo hisa e bandera aki pa 12’or di anochi.

 

Diasabra 18 di maart

Diasabra 18 di maart lo ta un otro dia grandi cu lo inicia pa 11.30 di mainta y lo termina 11’or di anochi. Lo bay tin reconocemento na ex-candidatonan di MEP, sigui pa inauguracion di e Expo Himno y Bandera. Den oranan di atardi for di 3’or te 5’or e hala hubenil HOT ta tuma over caminda nan lo presenta un programa bon varia cu Tipico inspiracion Folklorico, Chaz Dancers, Endrick Panneflek, Dazzling Divas, Danza Aruba, Asia Libiee, Kids 2 kids, Caryanne Koolman, Dariela y tambe lo bay tin varios reconocemento.

 

Clausurando e dia aki den un forma expectacular lo bay tin presentacion di varios banda musical popular: Mystical Connection, Tsunami, D’licious y Buleria (Mama Mia). Manera custumber lo bay tin tambe tentnan cu benta di cuminda crioyo y un bar bon surti.

Partido MEP ta invita henter comunidad pa bin pasa un rato alegre na su Sede na Santa Cruz riba e dos dianan aki y p’asina hunto cu e famia grandi di MEP duna honor y respet na nos simbolonan di union y libertad y presencia e apertura glorioso di campaña 2017 di MEP.

Leave a Reply

Top